Qazaqstan qurǵaqshylyq saldarynan jyl saıyn 93 mlrd teńge joǵaltady

NUR-SULTAN. QazAqparat – Qazaqstan jyl saıyn qurǵaqshylyq saldarynan 93 mlrd teńge joǵaltady. Bul týraly búgin Aqordada Memleket basshysy Qasym-Jomart Toqaevtyń Prezıdenttik kadr rezervine engen jastarmen kezdesýinde Japonııa ulttyq saıası zertteýler ınstıtýtynyń PhD doktoranty Zúlfııa Súleımenova aıtty, dep habarlaıdy QazAqparat tilshisi.

«Meniń dıssertatsııam Syrdarııa ózeni basseınindegi sý yntymaqtastyǵyna arnalǵan. Bul taqyryp Qazaqstan úshin ózekti. Qazirdiń ózinde biz sý táýekelderimen betpe-bet kelip otyrmyz. Búginde sý kúızelisiniń deńgeıi 25-ten 75 paıyzǵa deıin baǵalanady. Qazaqstan jyl saıyn qurǵaqshylyq saldarynan oryn alatyn shóleıttený nátıjesinde shamamen 93 mlrd teńge joǵaltady», - dedi ol.

Osy rette ol elimizdiń sý jáne ekologııalyq kúntártibinde turǵan birqatar usynys jasady.

«Birinshiden, ekonomıkanyń sý qamtymdylyǵyn qysqartý qajet. Biz daıyndalýyna sýdyń óte úlken mólsheri shyǵyndalatyn taýarlar óndiremiz. Tapshylyq onyń jetispeýshiliginen ǵana emes, sonymen qatar aýyl sharýashylyǵy men energetıka sektoryndaǵy suranystyń joǵary bolýynan oryn alyp otyr. Ekinshiden, jerasty sýynyń lastanýyna jol bermeý sharalaryn kúsheıtý qajet», - dedi bolashaq ǵalym.

Onyń aıtýynsha, aýanyń jáne jer betindegi sýdyń lastanýyn tómendetý, aýyl sharýashylyǵynda zııandy hımıkattar paıdalanýdy azaıtý esebinen jerasty sýlarynyń lastanýyn azaıtýǵa bolady. Tsırkýlıarly ekonomıka men qaldyqsyz óndiristi damytýdy yntalandyrý da qajet.

«Úshinshiden, halyqaralyq yntymaqtastyqty kúsheıtken jón. Qazaqstan sýynyń 44 paıyzy odan tysqary aýmaqta qalyptasady. Keıbir aýdandarda bul tsıfr 80 paıyzǵa jetedi. Sondyqtan kórshilerimizben tıimdi yntymaqtastyqty qalyptastyrýymyz qajet. Sebebi sý – bul bizdiń ortaq baılyǵymyz. Tórtinshiden, ár adamnyń jaýapkershiligi ıdeıasyn ilgeriletýimiz qajet. Bul máselemen osy salanyń mamandary ǵana aınalyspaýy tıis», - dedi Zúlfııa Súleımenova.