Qazaqstan kúres federatsııasyna jańa basshy keldi

ASTANA. KAZINFORM - Búgin «grek-rım, erkin jáne áıelder kúresi federatsııasy» respýblıkalyq qoǵamdyq birlestiginiń jyldyq qorytyndy Konferentsııa otyrysy ótti.

Otyrysta 2025 jylǵy jumys qorytyndylary, ulttyq quramalardyń halyqaralyq jarystardaǵy nátıjeleri, 2026 jylǵa arnalǵan mindetter talqylandy, sondaı-aq federatsııa prezıdentin saılaý ótti.

Alqaly jıynda konferentsııa qatysýshylarynyń sheshimimen Qazaqstannyń grek-rım, erkin jáne áıelder kúresi federatsııasynyń prezıdenti bolyp Erkin Oqasov saılandy. 

Talaı jyl tabandy eńbek etip, osy ýaqytqa deıin federatsııa prezıdenti qyzmetin atqarǵan Dáýlet Bolatuly Turlyhanovqa alǵys aıtyldy.

- Kúrestiń týyn túsirmeı, qazaq sportyn álemge asqaqtata berý úshin bar kúsh-jigerimdi salamyn. Senim bildirgen barsha jandarǵa myń alǵys jáne ózderińizdiń qoldaýlaryńyz arqyly talaı belesterdi birge baǵyndyramyz dep senemin, - dedi Erkin Oqasov.

Erkin Oqasov – Batys Qazaqstan oblysynyń týmasy. Kásipker, «VD Stroı-Injınırıng» JShS baqylaý keńesiniń tóraǵasy. Osy ýaqytqa deıin «Qazaq kuresi» qaýymdastyǵynyń vıtse-prezıdenti qyzmetin atqardy.