Qazaqstan quramasynyń oıynshysy «Qaısardyń» quramyn tolyqtyrdy

QYZYLORDA. QazAqparat - Qazaqstandyq belgili fýtbolshy Eldos Ahmetov bıyl Qyzylordanyń «Qaısar» komandasynyń namysyn qorǵaıdy, dep habarlaıdy QazAqparat tilshisi klýbtyń baspasóz qyzmetine silteme jasap.

Eldos Ahmetov 1990 jyldyń 1 maýsymynda Taraz qalasynda dúnıege kelgen. Úlken fýtboldaǵy alǵashqy qadamyn 2007 jyly týǵan qalasyndaǵy «Jambyl» komandasynda bastaǵan. Odan keıingi jyldarda Tarazdyń OSShIOSD, «Taraz», Pavlodardyń «Ertis», elordanyń «Astana», Almatynyń «Qaırat» klýbtarynda ótkizgen. 2012 jyldan beri Qazaqstan ulttyq quramasynda el namysyn qorǵap keledi.

«Qaısar» komandasy byltyr Qazaqstan kýbogyna ıe boldy. Bıyl Eýropa lıgasyna qatysady. Qazirgi tańda Túrkııada oqý-jattyǵý jıynyn ótkizip júrgen qyzylordalyq klýbtyń synaǵyna óz elimizden Baǵdat Qaıyrov, Qýanysh Qalmuratov, Reseıden Alekseı Shýmskıh, Ýkraınadan Rızvan Ablıtarov, Mozambıkten Rejınaldo Faıfe, Portýgalııadan Nanı, Kabo-Verde elinen Elvın Fortes keldi.

«Qaısardyń» alǵashqy oqý-jattyǵý jıyny 3-27 aqpan aralyǵynda ótkiziledi. Daıyndyq barysynda eki joldastyq kezdesý ótkizý josparlanǵan.

Sondaı-aq, Túrkııada aýa-raıynyń qolaısyzdyǵynan 6 qańtarda oqý-jattyǵý jıyny ótpeı qalǵanyn habarlaǵan edik.