Qazaqstan quramasynyń Devıs kýbogyndaǵy qarsylastary anyqtaldy
NUR-SULTAN. QazAqparat – Ispanııanyń Malaga qalasynda búgin Devıs kýbogy toptyq kezeńiniń jerebesi tartyldy, dep habarlaıdy QazAqparat tilshisi.
Qazaqstan tennıs federatsııasy málim etkendeı, toptyq kezeń matchtary bıylǵy 14-18 qyrkúıekte tórt qalada ótedi.
Qazaqstan quramasy D tobynda Glazgo qalasynda kort ıeleri – Ulybrıtanııa, sondaı-aq AQSh jáne Nıderlandy quramalarymen oınaıdy.
2019 jyly Madrıdte qazaqstandyqtar toptyq kezeńde Ulybrıtanııa jáne Nıderlandy tennısshilerimen synǵa túsken bolatyn.
Onda Qazaqstan quramasy nıderlandylyqtardan 2:1 esebimen basym túsip, dál sondaı eseppen ulybrıtanııalyqtarǵa jol bergen edi.
Al AQSh quramasymen alǵash ret sheberlik baıqaspaq.
Sondaı-aq A tobynda Bolonıada Italııa, Horvatııa, Argentına, Shvetsııa quramalary ózara kúshtini anyqtaıdy.
V tobynda Valensııada Ispanııa, Kanada, Serbııa jáne Ońtústik Koreıanyń joldary túıisedi.
C tobynda Gambýrgte Germanııa, Frantsııa, Belgııa jáne Aýstralııa quramalary kortqa shyǵady.
Devıs kýbogynyń toptyq kezeńi alǵash ret tórt qalada ótse, pleı-off básekeleri Malagada bolady.
Pleı-off kezeńine ár toptan eki úzdik komanda joldama alady. Kýboktyń sheshýshi oıyndary 23-27 qarashada ótip, jeńimpaz anyqtalady.
Eske sala keteıik, budan buryn tennısten Qazaqstan jasóspirimder quramasynyń Indonezııany oısyrata utqanyn jazǵan bolatynbyz.
Sondaı-aq qazaqstandyq tennısshi Rımde negizgi týrnırge joldama aldy.
