Qazaqstan quramasynyń 2018 jylǵy Azııa oıyndaryna arnalǵan kıim úlgisi tanystyryldy
ASTANA. QazAqparat - Qazaqstan ulttyq quramasy Jazǵy Azııa oıyndaryna otandyq óndirýshiler daıyndaǵan jańa kıim úlgisimen attanady, dep habarlaıdy «QazAqparat» HAA Qazaqstan Ulttyq Olımpıadalyq komıtetiniń basasóz qyzmetine silteme jasap. Sportshylardyń jańa obrazyn jasaýda kóshpendiler taqyryby basty nazarǵa alyndy.
Kollektsııanyń negizgi nysany - tehno-stılde oryndalǵan suńqar qus. Qazaqstan tarıhynda jyrtqysh qustarmen ań aýlaý úlken mańyzǵa ıe ekeni belgili. Ańdy kóp qaǵatyn qustar erkindiktiń, bıikke umtylýdyń sımvoly bolyp esepteledi. Negizgi detaldardyń biri retinde barlyq ónimderden kórinetin «KZ» áripterin aıtýǵa bolady.
Sporttyq ekıpırovka jattyǵýǵa jáne sherýge arnalǵan kostıýmderden, polo, sholaq shalbar, jeńil jeıde jáne ózge de qajetti elementterden quralǵan. Barlyǵy 16 baǵyt bar. Formanyń dızaıny men daıyndalýy qazaqstandyq óndirýshilerge tapsyryldy. Formadaǵy kıimderdiń barlyǵy Azııa oıyndaryn qabyldaýshy memleket - Indonezııanyń klımattyq erekshelikterin esepke ala otyryp daıyndaldy.
