Qazaqstan quramasynda oınaǵan taǵy eki fýtbolshy «Astanadan» ketti
NUR-SULTAN. QazAqparat – Qazaqstan quramasynda oınaǵan taǵy eki fýtbolshy «Astanadan» ketti, dep habarlaıdy QazAqparat tilshisi.
«Astana» fýtbol klýby málim etkenindeı, qaqpashy Aleksandr Mokın men shabýylshy Sergeı Hıjnıchenkomen eńbek kelisimsharty támamdalǵan.
A.Mokın «Astanaǵa» 2016 jyly keldi. Sodan beri klýbpen birge úsh márte el chempıony atandy. Osy kezeńde Aleksandr 58 matchta, sonyń ishinde Eýrokýbok oıyndarynda «Astananyń» qaqpasyn qorǵady.
S.Hıjnıchenko elordalyq klýbqa eki márte kelgen. Alǵash ret Sergeı 2010 jyly «Astana» jeıdesin kıdi. Sodan keıin 2019 jyly qaıta oraldy. Osy ýaqytta ol 30 kezdesýde 6 gol soǵyp, bir ret nátıjeli pas berdi.
«Astana» fýtbol klýby A.Mokın men S.Hıjnıchenkoǵa alǵysyn bildirip, aldaǵy sporttyq joldaryna sáttilik tiledi.
Eske sala keteıik, budan buryn Qazaqstan quramasynyń jartylaı qorǵaýshysy Serikjan Mýjıkovtiń «Astanadan» ketkenin jazǵan bolatynbyz.
KazFootball.kz málimetine qaraǵanda, S.Mýjıkovtaı tájirıbeli fýtbolshyny óz qatarlarynan kórýge tórt birdeı klýb – «Tobyl», «Qaısar», «Jetisý» jáne «Ordabasy» qulshynys bildirip otyr.
