Qazaqstan quramasynan taǵy bir boksshy jartylaı fınalǵa joldama aldy

ASTANA. QazAqparat – Tashkent qalasynda bokstan erler arasynda ótip jatqan álem chempıonatynda Nurbek Oralbaı jartylaı fınalǵa shyqty, dep habarlaıdy QazAqparat tilshisi.

Nurbek Oralbaı 80 kelige deıingi salmaqta Azııa chempıony, ıordanııalyq Hýsseın Eıshaısh Ishaıshpen sheberlik baıqasty.

Ótken jyly Iordanııa astanasy Ammanda ótken Azııa birinshiliginiń jartylaı fınalynda Nurbek dál osy boksshyǵa jol berip, qola júldeni qanaǵat tutqan edi.

Bul joly alǵashqy eki raýnda bes tóreshi túgeldeı basymdyqty qazaqstandyq boksshyǵa berdi. Qorytyndy esep – 5:0, Nurbektiń paıdasynda.

Osylaısha, Nurbek ıordanııalyq boksshydan qarymta qaıyryp, jartylaı fınalǵa joldama aldy.

Eske sala keteıik, budan buryn Qytaı quramasyndaǵy qazaq boksshysynyń álem chempıonatynda qarsylasyn nokaýtpen utqanyn jazǵan edik.

Sondaı-aq Dýlat Bekbaýov shırek fınalǵa ótti. Al Nurqanat Raıys pen Serik Temirjanov shırek fınalǵa shyǵa almady.

Ulttyq qurama kapıtany Aslanbek Shymbergenov qarsylasyn eki ret nokdaýnǵa jiberdi.