Qazaqstan quramasyna Eýropa chempıonatyna shyǵatyn kez keldi - Qaırat Boranbaev
ASTANA. QazAqparat - «Qaırat» fýtbol klýbynyń Baqylaý keńesiniń tóraǵasy Qaırat Boranbaev 2020 jylǵy Eýropa chempıonatynyń irikteý týrnırine tartylǵan jerebege qatysty pikirin bildirdi, dep habarlaıdy QazAqparat «SPORTINFORM» SAA-ǵa silteme jasap.
Keshe Irlandııa astanasy Dýblınde EURO-2020 irikteý kezeńiniń jerebesi tartyldy. Onyń nátıjesi boıynsha Qazaqstan quramasy Belgııa, Reseı, Shotlandııa, Kıpr jáne San-Marınomen birge І tobyna tústi.
Resmı sharaǵa qazaqstandyq metsenat, bıznesmen, almatylyq «Qaırat» klýbynyń ıesi Qaırat Boranbaev qatysty. Dýblınde, jerebe tartý rásiminen tys, eki kún boıy ÝEFA atqarý komıtetiniń otyrysy bolady. Qazaqstan Fýtbol federatsııasy atqarý komıtetiniń múshesi ári QFF Halyqaralyq baılanystar komıtetiniń basshysy retinde Qaırat Boranbaev birneshe iskerlik kezdesý ótkizdi.
«Ulttyq fýtbol federatsııalary qashanda fýtbol jáne ony damytý máselelerin talqylaýǵa ashyq. Búgin ÝEFA 2024 jylǵa deıingi damý strategııalyq jospary men taldaýyn tanystyrdy. Oǵan ÝEFA prezıdenti Aleksandr Cheferınmen birge uıymǵa múshe ulttyq qaýymdastyqtardyń bári qatysty», - dedi Q.Boranbaev.
- Jerebe qorytyndylary týraly pikirińiz qandaı? Qazaqstan quramasy Belgııa jáne Reseı komandalarymen bir topqa tústi. Qazaqstan quramasynyń qaı oryndy ıelenýge shamasy keledi? Toptan shyǵýǵa basty úmitkerler kimder?
- Bizdiń quramaǵa aıtýly nátıjelerge qol jetkizetin, Eýropa chempıonatyna baratyn ýaqyt jetti. Menińshe, qazir qazaqstandyq fýtbolshylardyń jaqsy býyny ósip jetilgen. Olar aldyna qoıylǵan mindetterdi sheship, qajetti nátıjege qol jetkizýge shamasy keledi. Qazaqstan quramasy fýtbolshylarynyń aldyna, eger olar qazaq fýtbolynyń tarıhynda iz qaldyrǵysy kelse, barynsha kóp mindet qoıý qajet.
Eýro-2020 irikteý kezeńiniń toptary:
A toby: Anglııa, Chehııa, Bolgarııa, Chernogorııa, Kosovo
B toby: Portýgalııa, Ýkraına, Serbııa, Lıtva, Lıýksembýrg
C toby: Nıderlandy, Germanııa, Soltústik Irlandııa, Estonııa, Belarýs
D toby: Shveıtsarııa, Danııa, Irlandııa, Grýzııa, Gıbraltar
E toby: Horvatııa, Ýels, Slovakııa, Vengrııa, Ázerbaıjan
F toby: Ispanııa, Shvetsııa, Norvegııa, Rýmynııa, Farersk araldary, Malta
G toby: Polsha, Avstrııa, Izraıl, Slovenııa, Makedonııa, Latvııa
H toby: Frantsııa, Islandııa, Túrkııa, Albanııa, Moldova, Andorra
I toby: Belgııa, Reseı, Shotlandııa, Kıpr, Qazaqstan, San-Marıno
J toby: Italııa, Bosnııa jáne Gertsegovına, Fınlıandııa, Gretsııa, Armenııa, Lıhtenshteın
Eýropa chempıonatynyń fınaldyq kezeńine ár toptyń úzdik eki komandasy joldama alady. 20 joldama osylaı anyqtalsa, qosymsha oıyndar arqyly taǵy tórt qurama belgili bolady.
Buǵan deıin habarlaǵanymyzdaı, ÝEFA fýtboldan 2020 jylǵy Eýropa birinshiligi irikteý kezeńiniń oıyn kúntizbesin jarııalady. Oǵan sáıkes, Qazaqstan irikteý kezeńin óz alańynda bastaıtyn boldy. Bizdiń qurama 21 qarashada Shotlandııamen kezdesedi.
