Qazaqstan quramasy velotrekten Azııa chempıonatynda 8 medal jeńip aldy
ASTANA. QazAqparat - Malaızııa astanasy Kýala-Lýmpýrde trektegi velosporttan ótken Azııa chempıonatynda Qazaqstan quramasy 8 júldege ıe boldy, dep habarlaıdy «QazAqparat» tilshisi.
QR velosıped sporty federatsııasynan túsken málimetke qaraǵanda, medaldiń ekeýi kúmis, altaýy - qola.
Elıtalyq topta «Astana» velokomandasynyń múshesi Artem Zaharov jekeleı izge túsip jarysýda jáne omnıýmnan qos qolany enshiledi. Omnıým A.Zaharovtyń oń jambasyna keletin sport túri sanalady, osyndaı jarysta Soltústik Qazaqstan oblysynyń velosportshysy 2016 jylǵy Olımpıadada úzdik ondyqtyń qataryna engen bolatyn.
Jastar arasynda Qazaqstan quramasy tórt medaldi jeńip aldy. Munda Maksım Grıdchın jekeleı izge túsip jarysýda márege ekinshi bolyp kelse, Andreı Chýgaı sprıntten, Vıktor Golov 1 myń metrlik gıtten, Ramıs Dinmuhametov upaılar sany boıynsha toptyq básekede úshinshi orynǵa kóterildi.
Azııa birinshiliginde sondaı-aq qyzdar arasynda Anastasııa Shapovalova júldege ilikti. Ol 500 metrlik gıtten ekinshi, sprıntten úshinshi orynǵa ıe boldy.
Bul jolǵy Azııa chempıonaty Qazaqstan úshin taǵy bir oqıǵamen erekshelendi. Qazaqstandyq velosportshy sprıntten alǵash ret 10 sekýndtyq mejeni baǵyndyrdy. Bul rekordtyq nátıjege (9,965 sekýnd) Pavel Vorjev qol jetkizdi.
Trektegi velosporttan Qazaqstan quramasynyń bapkeri Vladımır Býshanskııdiń aıtýynsha, bul 2018 jylǵy Azııa oıyndary qarsańyndaǵy mańyzdy jarys boldy. Altynǵa qol jetpegenimen, qazaqstandyqtar tym-táýir óner kórsetti. Qarsylas quramalar da kúshti bola túsken. Mysaly, Japonııa komandalyq jarysta Azııa rekordyn ornatty. Komandalyq jarysta Qazaqstan tórtinshi orynǵa taban tiredi. Eń bastysy, biraz jas sportshylardyń múmkindigi bar ekendigi kórindi. Endigi maqsat - tamyz aıynda bastalatyn Azııa oıyndaryna durystap daıyndalý.
Eske sala keteıik, budan buryn Mıanmada shossedegi velosporttan ótken Azııa chempıonatynan Qazaqstan quramasy 2 altyn, 1 qola júldemen oralǵan bolatyn.
