Qazaqstan quramasy V Halyqaralyq armııa oıyndarynda jalpykomandalyq esepte marapattaldy

NUR-SULTAN. QazAqparat - Máskeý oblysyndaǵy «Alabıno» polıgonynyń «Patrıot» saıabaǵynda V Halyqaralyq armııa oıyndarynyń saltanatty jabylý rásimi men jalpykomandalyq esepte jeńimpazdar men júldegerlerdi marapattaý sharasy ótti. Jarys qorytyndysynda Qazaqstan Qarýly kúshteriniń quramasy úshinshi oryn aldy, dep habarlaıdy QazAqparat tilshisi QR Qorǵanys mınıstrliginiń baspasóz qyzmetine silteme jasap.

V Halyqaralyq armııa oıyndarynyń jabylý sharasyna elimizdiń áskerı vedomstvosynyń basshysy Nurlan Ermekbaev qatysty. Ol sheteldik áriptesterimen kezdesip, áskerı yntymaqtastyq máselelerin talqylady. Sonymen qatar Qazaqstan Qarýly kúshteri quramasyn 2019 jylǵy armııa oıyndarynda laıyqty óner kórsetýlerimen quttyqtady. Qazirdiń ózinde uıymdastyrýshylar, sarapshylar jáne qatysýshylar bul jolǵy mereıtoılyq oıyndardyń eń aýqymdy bolǵandyǵyn moıyndap otyr. Bıyl dalalyq, teńiz jáne áýe daǵdylary boıynsha 32 konkýrstan turatyn jarysqa 39 elden 223 komanda qatysty. Bul rekordtyq san sanalady. Buǵan qosa, konkýrs 10 eldegi 21 polıgonda, Kaspıı, Baltyq teńizderi jáne Parsy shyǵanaǵy aıdyndarynda bir mezette ótkizilgen bolatyn.

2019 jylǵy armııa oıyndary baǵdarlamasyndaǵy 3 konkýrs Qazaqstan jerinde ótti. Qazaqstan aýmaǵynda mınoatqysh eseptoptarynyń – «Artıllerııalyq oq atý sheberleri», ushqyshsyz ushý qurylǵylarynyń – «Suńqar ańshylyǵy» jáne baılanysshylar arasyndaǵy – «Senimdi qabyldaý» saıystary boldy .Atalǵan oıyndardyń biri «Senimdi qabyldaý» saıysynda qazaqstandyq áskerı baılanysshylar naǵyz jeńimpaz atandy, al ekinshi oryndy Reseı men Qytaı ózara bólisti, úshinshi oryn – Belarýs eliniń enshisinde. Ushqyshsyz ushý qurylǵylary eseptoptarynyń arasyndaǵy «Suńqar salý» saıysynda Qazaqstan birinshi oryn aldy.

Komanda qarsylastaryn daıyndyq jyldamdyǵy men ushqyshsyz ushý qurylǵylarynyń ushý nátıjelerimen anyqtady, baqylaý núktesiniń baǵytymen ushyp ótýde qazaqstandyqtar úzdik nátıje kórsetti. Ekinshi oryn Reseı men Belarýs, úshinshi oryn – Irannyń qanjyǵasyna baılandy.

Armııa oıyndarynyń aýqymdy konkýrstarynyń biri – «Artıllerııa atysynyń sheberleri» boıynsha - altyn medal Qazaqstan áskerı qyzmetshileriniń qorjynynda, kúmis júldege reseılikter laıyq dep tanylsa, qola júlde ózbek aǵaıyndarǵa buıyrdy. Rıazanda ótken «Avıadarts» baıqaýynyń birinshi kezeńinde bizdiń áskerı ushqyshtar úzdik daıyndyqtaryn kórsetti. Sý-25 joıǵyshynyń, MI-35 jáne Mı-171Sh tikushaqtarynyń ekıpajdary alǵashqy oryndy ıelense, Sý-30SM joıǵyshynyń ushqyshy úshinshi oryndy enshiledi. Máskeý oblysynda ótken «Adal dos» baıqaýynda bizdiń kınologtar komandalardyń reıtıngi joǵary ókilderiniń arasyndaǵy jeke birinshilikke talas oıyndarynda birinshi oryndy ıelendi. «Tank bıatlony» konkýrsynda Qazaqstan tankishileri úshinshi oryn aldy.

Áskerı jarys jankúılerleri men kez kelgen azamat konkýrs barysyn, oıyndardyń ashylý jáne jabylý saltanatyn shynaıy ýaqyt rejiminde tamashalaı aldy. Onlaın-translıatsııa birneshe ınternet alańda, sondaı-aq Qazaqstannyń sport telearnasynyń efırinde kórsetildi.