Qazaqstan quramasy sokkadan álem chempıonatynyń jeńimpazy boldy

ESSEN. QazAqparat – Astana ýaqytymen maýsymnyń 11-inen 12-sine qaraǵan túni Germanııanyń Essen qalasynda sokkadan álem chempıonatynyń fınaldyq matchy ótti, onda Qazaqstan men Ýkraına quramasy bas júldege talasty, dep habarlaıdy QazAqparat Sports.kz-ke silteme jasap.

Bul oıyndy revansh dep te ataýǵa bolady. Sebebi komandalar 2023 jylǵy álem chempıonatynyń toptyq kezeńinde kezdesip, onda Ýkraına 6:2 esebimen basym túsken edi.

Onynshy mınýtta Abaı Elemesov qazaqstandyqtardy alǵa shyǵarsa, 14-mınýtta Altynbek Myrzabekov esepti eseledi. 18-mınýtta qarsylas komanda oıynshysy Andreı Melnık alǵashqy golyn soqsa, 37-mınýtta dýbl avtory atanyp, esepti teńestirdi.

Matchtyń negizgi ýaqyty teń aıaqtalyp, oıyn býllıt serııasymen jalǵasty. Onda qazaqstandyqtar 2:1 esebimen jeńiske jetti. Qorytyndy esep – 4:3. Osylaısha, Qazaqstan quramasy óz tarıhynda alǵash ret sokkadan álem chempıonatynyń altyn medalin ıelendi. 2022 jyly ulttyq komanda fınaldyq matchta Brazılııadan 0:3 esebimen jeńilip, «kúmisti» qanaǵat tutqan bolatyn. Sokka – shaǵyn fýtboldyń bir túri. Aıyrmashylyǵy oıynshy sany men alańnyń kóleminde. Match 20 mınýttan eki taım bolady jáne ár komandada 6 oıynshydan qatysady.