Qazaqstan quramasy short-trekten álem kýbogy kezeńiniń qola júldegeri atandy
ORAL. QazAqparat - Mınsk qalasynda short-trekten márege jetken álem kýbogynyń qorytyndy, altynshy kezeńinde Qazaqstan ulttyq quramasy erler arasyndaǵy estafetalyq jarysta 5 myń metrlik qashyqtyqta synǵa tústi, dep habarlaıdy «QazAqparat» HAAtilshisi.
Reseıdiń «Match Igra» telearnasynan tikeleı efırde kórsetkenindeı, sońǵy synǵa Qytaı, Reseı, Gollandııa jáne Qazaqstan quramalary shyqty. Qazaqstandyqtar sapynda batysqazaqstandyqtar Abzal Ájiǵalıev, Aıdar Bekjanov, Nurbergen Jumaǵazıev jáne atyraýlyq Denıs Nıkısha óner kórsetti. Máre syzyǵyn gollandııalyqtar birinshi bolyp qısa, quramynda qos birdeı Olımpıada chempıony bar reseılikter kúmis júldeger atandy. Al qazaqstandyqtar qola júldege ıe boldy.
Eske sala keteıik, Mınsk kezeńi Qazaqstannyń eńbek sińirgen jattyqtyrýshysy Mádiǵalı Qarsybekov bastaǵan mamandar baptaıtyn el quramasy úshin asa sátti boldy.
Aldymen keshe N.Jumaǵazıev 1 myń metr qashyqtyqta qola júldeni ıelense, búgin 500 metr qashyqtyqta Denıs Nıkısha altyn, Abzal Ájiǵalıev kúmis medaldy jeńip aldy. Sodan keıin Nurbergen óziniń oń jambasyna keletin 1 myń metrlik qashyqtyqta taǵy bir qola júldege qol jetkizdi.
