Qazaqstan quramasy shańǵymen tuǵyrdan sekirý jarysynan kúmis júlde enshiledi
SAPPORO. QazAqparat - Búgin VІІІ qysqy Azıada oıyndarynda Qazaqstan quramasy shańǵymen tuǵyrdan sekirý jarysynan kúmis júlde enshiledi, dep habarlaıdy Sapporodaǵy QazAqparat tilshisi.
Jerlesterimiz shańǵymen tuǵyrdan sekirýden komandalyq jarysta Qazaqstan erler quramasy kúmis júldeni jeńip aldy.
Bul básekede synǵa túsken Sabyrjan Múminov, Konstantın Sokolenko, Marat Japarov jáne Sergeı Tkachenko 771.0 upaı jınap, júldeli ekinshi orynǵa ıe boldy. Bas júldeni jarys qojaıyndary enshiledi. Olar 975.6 upaıǵa ıe boldy. Al qola medaldi Ońtústik Koreıa sportshylary ıelendi. Olardyń enshisinde 726.3 upaı.
Bul Qazaqstan quramasynyń qorjynyndaǵy segizinshi kúmis medal. Barlyǵy 23 júlde bar. Onyń altaýy altyn bolsa, toǵyzy qola medal.
Esterińizge sala keteıik, búgin bıatlonshylarymyz aralas estafeta (2×6 km - áıelder, 2×7,5 km -erler) aralyqtan bir altyn, bir kúmis medal jeńip alsa, hokkeıshi qyzdarymyz búgin Taıland quramasymen qola medaldi sarapqa salǵan bolatyn. Asa tartysty ótken básekede jerlesterimiz qarsylastaryn 8:0 esebimen oısyrata jeńip qola júldeni jeńip aldy.
