Qazaqstan quramasy sapynda ózimdi kórsetetin ýaqyt keldi – Tımofeı Skatov
La Serena qalasynda ótetin matchta Qazaqstan jeńimpaz atansa, Devıs kýbogi – komandalyq álem chempıonaty fınaldyq kezeńine tórtinshi ret joldama alady.
Qazaqstan tennıs federatsııasynan málim etkenindeı, Tımofeı Skatov el quramasy sapynda alǵash ret óner kórsetpekshi. Bir apta buryn ol Chılı quramasy úzdikteriniń biri Alehandro Tabılomen kezdesip, ony jeńgen edi. Sondyqtan bapkerlik shtab T.Skatovtan úlken úmit kútip otyr.
«Ne de bolsa, bárine daıyn bolý qajet. Báseke uzaqqa sozylyp, óte tartysty ótip, júıkege salmaq túsýi yqtımal. Onyń ústine biz syrt alańda oınaımyz. Jankúıerler óz tennısshilerine qoldaý kórsetetini anyq. Degenmen biz de myqtymyz, barymyzdy salatyn bolamyz. Tolqynys ta joq emes. Biraq kapıtan, barlyq qurama jáne búkil elimiz menimen birge, sondyqtan ózimniń ozyq ónerimdi kórsetýge ázirmin», dedi Qazaqstannyń ekinshi raketkasy Tımofeı Skatov.
Bapkerler asa tájirıbeli Aleksandr Nedovesov pen Andreı Golýbev jubyna da senim artady.
«Chılı sapynda juptyq synda kez kelgen 4-5 oıynshy shyǵa alady. Olardyń jekeleı synda nátıjeleri jaqsy. Ońaı match bolmasy anyq. Sondyqtan bárine de daıynbyz», dedi A.Golýbev.
Qazaqstan – Chılı matchynyń jerebesi 3 aqpan kúni tartylady.
Eske sala keteıik, budan buryn Qazaqstan quramasynyń Devıs kýbogi irikteý matchyna daıyndyqty bastaǵanyn jazǵan bolatynbyz.
Sýretter – Qazaqstan tennıs federatsııasy
