Qazaqstan quramasy Reseı komandasynan jeńilip qaldy - hokkeıden álem chempıonaty
ASTANA. Mamyrdyń 12-si. QazAqparat /Murat Jakeev/ - Qazaqstan quramasy hokkeıden álem chempıonaty aıasynda, mamyrdyń 11-i kúni bolǵan kezekti oıynda Reseı quramasynan 1:4 esebimen jeńilip qaldy.
Oıynnyń 11-shi mınýtynda esepti reseılikterdiń shabýyldaýshysy Aleksandr Ovechkın ashty. Oıynnyń ekinshi kezeńinde, atap aıtqanda 21-shi mınýtta - Ilıa Kovalchýk, 38-shi mınýtta - Aleksandr Semın Qazaqstan quramasynyń qaqpashysy V.Eremeevti qapy qaldyrdy. Al tórtinshi shaıbany oıynnyń sońyna 15 mınýt qalǵanda Reseı komandasynyń qorǵaýshysy Denıs Grebeshkov saldy.
Qazaqstandyqtar bolsa, oıyn bitýge birneshe sekýnd qalǵanda jalǵyz ǵana shaıbany soqty. Shaıbanyń avtory - Dmıtrıı Dýdarev.
Nátıjesinde, Reseı quramasy eki oıynnan keıin 6 upaı jınap, kelesi kezeńge qınalmaı ótip otyr. Al áli Slovakııamen bir oıyny bar Qazaqstan komandasynyń qorjynynda birde-bir upaı joq. Belarýs quramasymen bolǵan birinshi oıynynda qazaqstandyqtar 2:5 esebimen jeńilip qalǵan bolatyn.
Esterińizge sala keteıik, álem chempıonatynda Qazaqstan quramasy Belarýs, Slovakııa jáne Reseı komandalary kirgen «A» tobynda oınap jatyr.
Keshe bolǵan Belarýs jáne Slovakııa quramalarynyń oıyny 2:4 esebimen, slovaktardyń jeńisimen aıaqtaldy.
