Qazaqstan quramasy pankratıonnan álem chempıonatyna attandy
ASTANA. QazAqparat - QR Ulttyq MMA, pankratıon jáne grepplıng federatsııasynyń sportshylary pankratıonnan álem chempıonatyna qatysý úshin Reseıdiń Sochı qalasyna attandy, dep habarlaıdy QazAqparat.
Álem chempıonaty qazannyń 27-29 kúnderi «Adler-Arena» sport kesheninde barlyq jas sanatyndaǵy sportshylar arasynda ótedi. Uıymdastyrýshylar álemniń 30 elinen 700-den astam sportshy keledi dep kútýde.
Federatsııa prezıdenti Saǵyndyq Mekeevtiń basshylyǵymen álem chempıonatyna attanǵan Qazaqstan quramasy elimizdiń barlyq óńirleriniń derlik sportshylarynan jasaqtalǵan. Olardyń qatarynda Dáýren Ermekov, Erkinbek Injel, Goıtı Dazaev, Vıns Lev, Jalǵasuly Jumageldi syndy MMA men pankratıon boıynsha álem chempıonattarynyń birneshe dúrkin chempıondary men júldegerleri bar.
Aıta keterligi, qazaqstandyq sportshylar pankratıonnan ótetin kez kelgen týrnırdiń basty favorıti sanalady. Bul joly da sportshylarymyz birneshe altyn medal alýdy josparlaýda.
