Qazaqstan quramasy Grýzııa jáne Qyrǵyzstan fýtbolshylarmen oınaıdy
ASTANA. QazAqparat - Qazaqstan ulttyq quramasynyń joldastyq kezdesýdegi qarsylastary belgili boldy, dep habarlady QR Fýtbol federatsııasynyń baspasóz qyzmetinen.
«2016 jyldyń 29 naýryzynda Qazaqstan quramasy Tbılısıde Grýzııa fýtbolshylarymen kezdesedi. Al, 30 tamyz kúni syrt alańda Qyrǵyzstan quramasymen oınaıdy», - delingen habarlamada.
Aıta keteıik, Qazaqstan quramasy Grýzııa fýtbolshylarymen 2006 jylǵy Álem Chempıonatynyń irikteý týrnırinde bir topqa túsken edi. Almatyda ótken oıynda bizdiń fýtbolshylar 1:2 esebimen jeńilse, Tbılısıde ótken match 0:0 esebimen aıaqtaldy. Qazaqstan men Grýzııa quramalary arasyndaǵy sońǵy match 2013 jyldyń 14 tamyzynda «Astana Arena» stadıonynda ótti. Sol kezdesýde Sergeı Hıjnıchenko soqqan goldan keıin Qazaqstan quramasy 1:0 esebimen jeńiske jetken bolatyn.
Qazaqstan quramasy Qyrǵyz fýtbolshylarymen 7 joldastyq kezdesý ótkizip, onyń beseýinde jeńiske jetti. Al, eki oıynda jeńimpaz anyqtalmady. Eki eldiń quramalary arasynda sońǵy match 2014 jyldyń 5 qyrkúıeginde «Astana Arena» stadıonyda ótken edi. Sol oıynda Qazaqstan quramasy 7:1 esebimen aıqyn jeńiske jetken edi.
Eske sala keteıik, buǵan deıin Qazaqstan men Ázerbaıjan quramalary 26 naýryz kúni Túrkııanyń Antalııa qalasynda joldastyq match ótkizetini habarlanǵan-dy.
