Qazaqstan quramasy «Grand Prix» týrnırin ІІ orynmen aıaqtady
ASTANA. QazAqparat - Túrkııanyń Antalııa qalasynda kezekti «Grand Prix» týrnıri óz máresine jetti, dep habarlaıdy QazAqparat tilshisi.
Úsh kúnge sozylǵan dúbirli dodada Qazaqstan quramasynyń sportshylary el namysyn abyroımen qorǵap, jalpy komandalyq esepte jarysty ekinshi orynmen aıaqtady.
Jarystyń alǵashqy kúninde tatamıge shyqqan jeti dzıýdoshymyzdan Galbadrah Otgontsetseg (48 kg) pen Ǵusman Qyrǵyzbaev (60 kg) ekeýi týrnır jeńimpazy atanyp, qos altyndy qorjynǵa salsa, Azamat Muqanov (66 kg) pen Severa Nyshanbaeva (57 kg) jubanysh beldesýinde qarsylastaryna ese jiberip, jarysty 5-orynmen aıaqtady.
Jarystyń ekinshi kúninde erler - 73 kg jáne 81 kg , áıelder - 63 kg jáne 70 kg salmaqta ózara myqtylardy anyqtady. Jarystyń ekinshi kúninde de Qazaqstan quramasy júldesiz qalmady. 63 kelige deıingi salmaq dárejesinde beldesken burymdy balýanymyz Marıan Ýrdabaeva fınalǵa deıin qarsylas shaq keltirmeı, sońǵy synda súrinip, kúmisti mise tutty.
«Grand Prix» týrnıriniń sońǵy kúninde Qazaqstan qorjynyna taǵy úsh medal tústi. 100 kelige deıingi salmaqta beldesken tájirıbeli balýanymyz Maksım Rakov týrnırdiń kúmis júldegeri atansa, qyzdarymyzdan 78 kelige deıingi salmaqta el namysyn qorǵaǵan Zarına Raıfova men Albına Amangeldıeva qos qola medal ıelendi.
Aıta keteıik, 7-9 sáýir aralyǵynda Túrkııanyń Antalııa qalasynda ótken halyqaralyq «Grand Prix» týrnırine Qazaqstan quramasynan qatysqan 22 dzıýdoshymen qatar, 34 elden 252 sportshy qatysty.
