Qazaqstan quramasy fýtboldan UEFA Ulttar lıgasyn jeńispen bastady
NUR-SULTAN. QazAqparat - Qazaqstan quramasy fýtboldan UEFA Ulttar lıgasyn jeńispen bastady, dep habarlaıdy QazAqparat tilshisi.
Aıta ketsek, ulttyq qurama S lıgasy úshinshi tobynda synǵa túsedi. Qarsylastary - Ázerbaıjan, Belarýs pen Slovakııa.
Búgin qazaqstandyq fýtbolshylar óz alańynda Ázerbaıjan quramasyn qabyldady.
Kezdesý barysynda alǵashqy kezeńde ázerbaıjandyq oıynshylardyń belsendiligi baıqaldy. Olardyń gol soǵatyn birneshe múmkindigi bolǵan edi. Alaıda qarsylastar kózdegen nysanadan múlt ketip jatty.
Ekinshi kezeńde Abat Aıymbetov 50, 57-mınýttarda mergendik tanytty.
Osylaısha qazaqstandyq fýtbolshylar qarsylasynan 2:0 esebimen basym tústi.
Sondaı-aq, búgin atalǵan topta Belarýs jáne Slovakııa quramalary oınaıdy.
Endi Qazaqstan quramasy kelesi oıynyn 6 maýsymda syrt alańda Slovakııaǵa qarsy ótkizedi. Bul kúni Ázerbaıjan men Belarýs quramalary sheberlik baıqasady.
Eske salsaq, budan buryn UEFA Ulttar lıgasynda alǵashqy týr oıyndary bastalǵanyn habarlaǵan edik.
