Qazaqstan quramasy FIFA reıtınginde bir satyǵa joǵarylady
ASTANA. QazAqparat - Halyqaralyq fýtbol qaýymdastyqtary federatsııasynyń (FIFA) 2018 jyldyń qazan aıynyń qorytyndysy boıynsha jarııalaǵan reıtıngine sáıkes Qazaqstan ulttyq quramasy ótken aımen salystyrǵanda bir satyǵa kóterildi, dep habarlaıdy «SPORTINFORM» SAA.
Qazan aıynyń qorytyndysy boıynsha Qazaqstan quramasy 117 orynǵa jaıǵasty.
Qazaqstan quramasy qazan aıynda ÝEFA Ulttar Lıgasy aıasynda eki match ótkizdi. Syrt alańda Latvııa quramasymen 1:1 esebimen teń tússe, óz alańynda Andorra quramasyn 4:0 esebimen utty.
Stanımır Stoılov komandasy kelesi oıynyn 15 qarasha kúni «Astana Arena» stadıonynda Latvııamen ótkizedi.
Kezdesý Astana ýaqytymen 21:00-de bastalady.
19 qarasha kúni bizdiń fýtbolshylar syrt alańda Grýzııamen oınaıdy.
Eske sala ketsek, qyrkúıek aıyndaǵy reıtıngte Namıbııa men Zımbabve Qazaqstannyń aldyna shyǵyp ketken bolatyn.
