Qazaqstan quramasy dzıýdodan Prezıdent kýbogyna ıe boldy
ASTANA. QazAqparat - Keshe Aqtóbe qalasynda dzıýdodan Qazaqstan Respýblıkasynyń Prezıdenti Kýbogyna arnalǵan erler arasyndaǵy halyqaralyq týrnırde Qazaqstan quramasy bas júldeni jeńip aldy, dep habarlaıdy QazAqparat tilshisi.
Elimizde tuńǵysh ret uıymdastyrylyp otyrǵan Prezıdent kýbogyna 9 memleketten 10 komanda qatysty. Atap aıtqanda, Qazaqstan, Ózbekstan, Qyrǵyzstan, Ázerbaıjan, Grýzııa, Mońǵolııa, Reseı, Ýkraına, Ońtústik Koreıa, Belarýs elderiniń jáne Aqtóbe oblysynyń qurama komandasy ózara myqtyny anyqtady.
Aqtóbe qalasynda Respýblıkalyq «Týǵan jer» forýmy aıasynda ótkizilgen QR Prezıdent kýbogyna arnalǵan halyqaralyq týrnırdiń ashylý saltanatyna Qazaqstan Respýblıkasynyń Memlekettik hatshysy Gúlshara Ábdiqalyqova men Aqtóbe oblysynyń ákimi Berdibek Saparbaev qatysyp, sportshylarǵa sáttilik tilegen bolatyn. Sondaı-aq, bıyl tuńǵysh ret uıymdastyrylyp otyrǵan Prezıdent kýbogynda Olımpıada chempıondary Jaqsylyq Úshkempirov, ıÝrıı Melnıchenko, Ermahan Ibraımov, Baqtııar Artaev syndy sport tarlandary qurmetti qonaq boldy.
Jarys nátıjesi boıynsha Qazaqstan Respýblıkasy Prezıdenti kýbogyna Qazaqstan quramasynyń sportshylary ıe boldy. Qazaqstan quramasynan el namysyn Ǵumar Qyrǵyzbaev (66 kg), Eldos Jumahanov (66 kg), Jansaı Smaǵulov (73 kg), Qajymuqan Óteýlıev (81 kg), Suńǵat Zakarııaev (90 kg), Islam Bozbaev (90 kg), Erjan Shynkeev (+100 kg) abyroımen qorǵady. Olar fınaldyq kezdesýde Ońtústik Koreıa sportshylaryn 4:1 esebimen jeńip, týrnırdiń alǵashqy jeńimpazy atandy.
Qola medal úshin kúreste Grýzııa men Belarýs qurama komandasynyń sportshylary arasyndaǵy tatamı tartysynda Grýzııalyq dzıýdoshylar basym túsip, týrnırdiń qola júldesine qol jetkizdi.
2017 jyly uıymdastyrylǵan dzıýdodan Qazaqstan Respýblıkasynyń Prezıdenti Kýbogyna arnalǵan halyqaralyq týrnırde jeńimpaz ben júldegerlerge qarjylaı syıaqylar tabystaldy.
Nazarlaryńyzǵa jarys qorytyndysyn usynamyz:
1 oryn - Qazaqstan quramasy (4 000 000 tg)
2 oryn - Ońtústik Koreıa (2 700 000 tg)
3 oryn - Grýzııa (1 700 000 tg)
