Qazaqstan quramasy Bolgarııa sportshylarymen joldastyq kezdesý ótkizedi
ASTANA. QazAqparat - Fýtboldan Qazaqstan Ulttyq quramasy 2018 jyldyń 26 naýryzy kúni Bolgarııamen joldastyq match ótkizedi, dep habarlaıdy «QazAqparat» HAA tilshisi Qazaqstan fýtbol federatsııasynyń resmı saıtyna silteme jasap.
Oıyn Vengrııanyń Felchýt qalasyndaǵy «Pancho Arena» stadıonynda ótedi. Match jergilikti ýaqytpen 18:00-de bastalady.
«Bolgarııa quramasy FIFA reıtınginde 42-orynda tur. Komandany belgili bolgarııalyq maman Petar Hýbchev jattyqtyrady. Qarsylas komandanyń quramynda Ivelın Popov («Spartak», Máskeý, Reseı), Georgıı Mılanov (TsSKA, Máskeý, Reseı) Nıkolaı Bodýrov (TsSKA, Sofııa), Aleksandr Tonev («Krotone», Italııa) syndy tájirıbeli oıynshylardy atap ótýge bolady», -delingen habarlamada.
2013 jyly eki qurama Almatyda joldastyq match ótkizgen bolatyn. Sol oıynda Bolgarııa 2:1 esebimen jeńiske jetken. Qazaqstan quramasynan gol soqqan fýtbolshy - Dımıtrıı Shomko.
Eske sala ketsek, buǵan deıin Qazaqstan quramasy Vengrııamen joldastyq kezdesý ótkizetini habarlanǵan bolatyn. Ol match 23 naýryz kúni Vengrııa astanasy Býdapeshtte «Grýpama Arena» stadıonynda ótedi.
Foto: kff.kz
