Qazaqstan quramasy álemniń tanymal taekvondoshylarymen aıqasady
ASTANA. QazAqparat - 19 tamyzda «Sport kúnine» oraı Atyraý oblysynda Iran, Reseı, Marokko, Koreıa jáne Armenııa elderiniń taekvondoshylary Qazaqstan taekvondoshylaryna qarsy jekpe-jek ótkizedi.
Qazaqstan namysyn əlem chempıonatynyń qola júldegeri Qaırat Sarymsaqov bastaǵan sportshylar qorǵaıdy, dep habarlaıdy dodasport.kz .
«Atyrau Sport Fest 2017» sport festıvali aıasynda Atyraý oblysy taekvondo federatsııasy álemniń eń myqty degen taekvondoshylarynyń basyn qosyp, komandalyq jekpe-jek ótkizbekshi.
58 keli salmaqta Atyraýlyq jas taekvondoshy, QR spartakıadasynyń jeńimpazy, jastar arasyndaǵy Azııa chempıonatynyń júldegeri jáne túrli halyqaralyq týrnırlerdiń jeńimpazy Saǵadat Joldasbaev reseılik sportshyǵa qarsy turmaq.
Reseılik Alekseı Rýdnık óz eliniń qola júldegeri bolyp tabylady. Sońǵy ret Atyraýda ótken «Qazaqstan Open» týrnırinde kúmis júldeger atanǵan.
63 keli salmaqta taǵy bir atyraýlyq jas sportshy Beksultan Latıf el namysyn qorǵaıtyn bolady. Beksultan asa iri jarystarda jeńiske jetip úlgermegen. Sondyqtan da oǵan taekvondo sportynyń otany - Koreıadan kelgen Djoý Mýn Hanǵa qarsy turý ońaıǵa soqpaıtyny anyq.
74 keli salmaqta Qazaqstan ulttyq quramasyndaǵy eń tájirıbeli taekvondoshy, jaqynda ǵana Koreıa elinde ótken álem chempıonatynyń qola júldegeri Qaırat Sarymsaqov synǵa túsedi.
Qaırattyń qarsylasy da osal emes. Marokka eliniń chempıony Mohammed Melloýk halyqaralyq týrnırlerde, Afrıka birinshilikterinde atoı salyp júrgen sportshy. Degenmen araǵa toǵyz jyl salyp Qazaqstannyń álem chempıonatyndaǵy júldegeri atanǵan Qaırat Sarymsaqov Arab túbeginen kelgen taekvondoshyny tize búktirýine senim mol.
80 kelide atyraýlyq tájirbıeli taekvondoshy Úmbet Shákıev synǵa túsedi. QR spartakıadasynyń jeńimpazy, jaqynda ǵana Ózbekstanda ótken Prezıdent Kýbogynyń júldegeri Iran eliniń sportshysyna qarsy turmaq.
+87 keli salmaqta Eýropa qurlyǵyndaǵy ataqty sportshylardyń biri armenııalyq Arman Eremıan baǵyn synaıdy. Ol Armenııa eliniń tarıhynda tuńǵysh ret Eýropa chempıony atanǵan. Tuńǵysh ret Armenııa taekvondoshylary arasynda Olımpıada oıyndaryna joldama alǵan. London olımpıadasynda óz eliniń jalaýyn kóterip shyqqan. Ýnıversıada oıyndarynyń birneshe dúrkin júldegeri.
Arman Eremıanǵa 30 jasar Salamat Qurbanııazov qarsy turmaq. Qos tájirıbeli taekvondoshylardyń arasynda báseke qyzyqqa toly bolatyny sózsiz.
