Qazaqstan quramasy álemde ekinshi orynda

Júlde qory - 31 400 dollar. Álemniń 27 memleketinen 200 asa kásipqoı sportshylar jarysqa tústi. Bul týrnır 13-shi ret jalaýyn kóterip otyr. Kishi álem chempıonaty sanalatyn dodaǵa qol kúrestiń jiliginiń maıyn ishken Denıs Tsyplenkov, Anderıı Pýshkar, Qajymurat Zoloev sekildi sportshylar baq synady. Týrnırde sportshylar 63, 70, 78 , 86, 95, +95 keli dárejesinde synǵa tústi. Jarystyń alǵashqy kúni sol qol arasynda júldeler sarapqa salyndy. Kásipqoılar arasynda ótken týrnırde 63 kelide qazaq eliniń namysyn týrnırde OQO Shardara aýdanynyń týmasy Ábilda Erjan qorǵady. Ol fınalda ýkraınalyq sportshy Ibrıshev Haıserdi aıqym basymdylyqpen utyp týrnırdiń jeńimpazy atanyp qorjynǵa alǵashqy altyndy saldy. 70 kelide taǵy bir shardaralyq sportshy Maǵjan Shámıev jaqsy óner kórsetip fınaldyq básekede ǵana reseılik Aleksandr Kovalchýkke jol berip kúmis medalǵa ıe boldy. Jartylaı fınal otandasy Maǵjanǵa jol bergen taǵy bir qazaqstandyq sportshy Farodjov Valı qola medalǵa ıe boldy. 86 keli salmaqta óner kórsetken Qydyrǵalı Ońǵarbaev ózinen álde qaıda úlken ákki sportshylardan basym túsip jartylaı fınalda reseılik Maksım Cherskııge jol berip qola medalǵa ıe boldy. Jarystyń ekinshi kúni báseke oń koldan ótti. 78 keli salmaq dárejesinde shardaralyq qol kúres sheberi Shynbolat Raıhanov qarsylas shaq keltirmedi. Jartylaı fınalda qazaqstandyq Janaly Hasanovtan basym tústi, al fınalda reseılik sportshy Andreı Malahovty erkin utyp qorjynǵa ekinshi altyn medal saldy. 70 kelide óner kórsetken sportshy Farodjov Valı fınalda germanııalyq sportshydan basym túsip, úshinshi altyndy qorjynǵa saldy. 63 kelide oń qoldan óner kórsetken Erjan Ábilda fınalda ǵana reseılik Maksım Eńdýbaevtan utylyp, kúmis medal aldy. Qyzdar arasynda ótken básekede 52 kelide Tatıana Verına men Darıa Vervıtskaıa altyn medalǵa ıe boldy. Qazaqstan ulttyq quramasyn osy týrnırge bastap barǵan aǵa jattyqtyrýshy shardaralyq Arman Qarsybaev pen Alıev Ahmedtiń eńbekteri orasan zor. Taǵy da Qazaqstan quramasy óziniń armrestlıngten álemde oıyp turyp oryn alatynyn taǵy da bir ret dáleldedi.
Jalpy beıresmı komandalyq esepte 5 altyn 3 kúmis 5 qola medalǵa ıe bolǵan Qazaq eli Reseıden keıin ekinshi orynǵa taban tiredi. Bıylǵy 2013 jyl qol kúres sheberleri úshin tolaǵaı tabysqa jetken jyl boldy dep tolyq aıta alamyz, dep habarlady alaman.kz.