Qazaqstan quramasynyń jańa bas bapkeri jaqyn arada taǵaıyndalady

ASTANA. KAZINFORM — Qazaqstan fýtbol quramasynyń jańa bas bapkeri jaqyn arada taǵaıyndalady. Bul týraly QR Týrızm jáne sport mınıstri Erbol Myrzabosynov Ortalyq kommýnıkatsııalar qyzmetinde ótken baspasóz máslıhatynda jýrnalısterdiń suraǵyna jaýap bere otyryp málimdedi.

Qazaqstan quramasynyń jańa bas bapkeri jaqyn arada taǵaıyndalady
Foto: Qazaqstan fýtbol federatsııasy

Mınıstrdiń aıtýynsha, ulttyq quramanyń bas bapkerin aýystyrý týraly sheshimdi Qazaqstan fýtbol federatsııasy qabyldaǵan. Qazir jańa mamandy taǵaıyndaý máselesi qarastyrylyp jatyr.

— Bul — Qazaqstan fýtbol federatsııasynyń jumysy. Bıylǵy maýsymnyń qorytyndysy boıynsha bas bapkerdi aýystyrý týraly sheshim qabyldandy. Jaqyn arada jańa bas bapkerdiń taǵaıyndalýyn kútip otyrmyz. Ázirshe bul jóninde naqty aqparat joq, — dedi Erbol Myrzabosynov.

Sondaı-aq mınıstr fýtbol klýbtaryn jekeshelendirý jáne kommertsııalandyrý jumystary týraly da aıtty.

Onyń málimetinshe, qazirgi ýaqytta 13 fýtbol klýby kommertsııalandyrylǵan. Taǵy alty klýb boıynsha tıisti jumystar júrgizilip jatyr.

— Jyl sońyna deıin bul jumys tolyq aıaqtalady. Qazir sońǵy kelisý rásimderi júrip jatyr. Bálkim, kelesi aptada «Astana» fýtbol klýbyn jekeshelendirý týraly resmı habarlaımyz, — dedi mınıstr.

Osylaısha, jyl sońyna deıin qalǵan alty fýtbol klýbyn kommertsııalandyrý jumystary aıaqtalyp, «Astana» klýbyn jekeshelendirý máselesine qatysty sheshim jarııalanýy múmkin. 

Buǵan deıin Qazaqstanda fýtbol klýbynyń bas bapkeri kúmándi matchtarǵa baılanysty shettetilgenin jazǵanbyz.