Qazaqstan quramasynyń shabýylshysy Belgııamen ótken oıyn týraly pikir bildirdi

ASTANA. KAZINFORM — Qazaqstan men Belgııa quramalary arasyndaǵy matchtan keıin, Kazinform agenttiginiń menshikti tilshisine Qazaqstan quramasynyń shabýylshysy Dastan Satpaev pikir bildirdi.

— Eń aldymen, búgin bizdiń quramany qoldaýǵa kelgen barlyq qazaqstandyq jankúıerlerge alǵys aıtqym keledi. Búgin qıyn oıyn boldy. Árıne, osyndaı nátıje úshin keshirim suraımyz. Biraq biz nátıjeni taldap, aldaǵy ýaqytta jaqsyraq bolýǵa tyrysamyz. Alla qalasa, bolashaqta Belgııa sekildi myqty quramalarmen teń dárejede básekelese alamyz, - dedi ol.

Sondaı-aq, ekinshi taımnyń 79-mınýtyndaǵy jyldam shabýyl epızody týraly qysqasha aıtyp ótti. 

Dastan Satpaev ortalyqtan sál solǵa qaraı qarsylas aıyp alańyna qaraı ótip, 20 metr qashyqtyqtan tómennen qaqpaǵa soqqy jasaǵan edi. Belgııa qaqpashysy Tıbo Kýrtýa dopty senimsiz túrde keri qaıtardy, biraq qazaqstandyq oıynshylar qaıtarylǵan dopqa jete almady.

— Múmkin Islam Chesnokovqa pas berýim kerek edi, biraq ózim soqqy jasaýǵa sheshim qabyldadym. Bul jaǵdaıda durys sheshim qabyldadym dep oılaımyn, — dedi Dastan Satpaev.

Eske salaıyq, Qazaqstan 2026 jylǵy álem chempıonatynyń irikteý kezeńindegi oıynda Belgııadan 0:6 esebimen jeńildi.

Keıin Qazaqstan quramasynyń bas bapkeri otstavkaǵa ketetinin málimdedi.