Qazaqstan quramasynyń múshesi Astanadaǵy JI olımpıadasyna daıyndyq qalaı ekenin aıtty
ASTANA. KAZINFORM – Qazaqstan quramasynyń Halyqaralyq jasandy ıntellekt olımpıadasynyń (IOAI-2026) qatysýshysy Ábý Qanabek komandanyń jarysqa qalaı daıyndalǵanyn aıtyp berdi.
Onynshy synyp oqýshysynyń aıtýynsha, bıyl olımpıadaǵa daıyndyq burynǵydan áldeqaıda qarqyndy ótken. Respýblıkalyq kezeńnen keıin úzdik 15 oqýshy iriktelip, ulttyq quramany jasaqtaý úshin arnaıy daıyndyq sabaqtary uıymdastyrylǵan.
— Bıylǵy olımpıadaǵa daıyndyqqa erekshe kóńil bólindi. Respýblıkalyq olımpıadadan keıin úzdik 15 qatysýshy iriktelip, halyqaralyq olımpıadaǵa qatysatyn quramdy anyqtaý úshin oqý-jattyǵý sabaqtary ótti. Ol shamamen 10–11 kúnge sozyldy. Sol ýaqytta túrli esepter shyǵardyq, jańa taqyryptardy meńgerdik, oqytýshylardyń dáristerine qatystyq, - dedi Ábý Qanabek.
IOAI-2026 olımpıadasynda Qazaqstannyń namysyn segiz oqýshy qorǵaıdy. Ábý Qanabektiń aıtýynsha, ulttyq qurama jarys bastalǵanǵa deıin shamamen bir apta buryn Astanaǵa kelip, qosymsha daıyndyqtan ótken.
— Biz basqa komandalardan erterek kelip, jańa taqyryptardy qaıtalap, tapsyrmalardy taldadyq. Bul olımpıadanyń ereksheligi – home task dep atalatyn aldyn ala beriletin tapsyrma bar. Birinshi týrdyń tapsyrmalary sonyń jalǵasy bolǵandyqtan, ony jan-jaqty túsiný mańyzdy. Sondyqtan biz sol materıaldardy da egjeı-tegjeıli qarastyrdyq, - dedi ol.
Ábý Qanabek úshin bul – halyqaralyq jasandy ıntellekt olımpıadasyna ekinshi ret qatysýy. Ótken jyly da ol Beıjińde ótken osy dodada Qazaqstan atynan synǵa túsken.
Onyń aıtýynsha, bıyl ulttyq quramanyń quramy birshama ózgergenimen, ótken jylǵy komandanyń birneshe múshesi bıyl da el namysyn qorǵaýǵa múmkindik alǵan.
Aıta keteıik, buǵan deıin Qazaqstan quramasy jasandy ıntellekt boıynsha ótken alǵashqy Ortalyq Eýropa olımpıadasynda — EUROAI 2026 jarysynda tabysty óner kórsetip, tórt medal, atap aıtsaq bir altyn, eki kúmis jáne bir qola júlde ıelengen edi.
