Qazaqstan quramasynyń bas bapkeri Ýelspen bolatyn oıynǵa qatysty pikir bildirdi

ASTANA.KAZINFORM — Qazaqstan quramasynyń bas bapkeri Álı Álıev 2026 jylǵy álem chempıonatynyń irikteý kezeńindegi Ýels quramasyna qarsy oıynǵa arnalǵan baspasóz máslıhatynda komandanyń daıyndyǵy týraly aıtty. 

— Birinshiden, oıynǵa daıyndalǵany úshin barlyǵyna alǵys aıtqym keledi. Biz fýtbolshylarymyz oınaıtyn qalalardy aralap, olardyń fızıkalyq jáne taktıkalyq jaǵdaılaryn baǵamdadyq. Oıynshylar oqý-jattyǵý jıynyna kóterińki kóńil-kúımen, zor yqylaspen keldi, — dedi bas bapker.

Sonymen qatar, Álıev quramadaǵy oıynshylardyń jaraqaty bar ekenin jasyrmady.

— Ókinishke qaraı, Erkin Tapalov shemirsheginen jaraqat alyp, oıynǵa qatysa almaıdy. Islam Chesnokovtyń belgili bir problemalary bar, ol týraly sheshim Ýels jáne Belgııamen bolatyn matchtardyń strategııasyn eskere otyryp qabyldanady. Klýb basshylyǵy men jattyqtyrýshylarǵa alǵysymdy bildirgim keledi, daıyndyqqa barlyǵy úles qosty, — dedi ol.

Aıta keteıik, Qazaqstan quramasy álem chempıonaty irikteý kezeńi aıasynda 4 qyrkúıekte Astanada Ýels quramasymen kezdesedi.

Osyǵan deıin habarlaǵanymyzdaı, Qazaqstan ulttyq quramasynyń bas bapkeri Álı Álıev álem chempıonaty irikteý kezeńindegi aldaǵy eki oıynǵa shaqyrylǵan fýtbolshylardyń naqty tizimin jarııalady.