Qazaqstan quramasynyń bas bapkeri Talǵat Baısýfınov qyzmetinen ketti
ASTANA. KAZINFORM – Talǵat Baısýfınov Qazaqstan ulttyq quramasynyń bas bapkeri qyzmetinen ketti. Bul týraly Qazaqstan fýtbol federatsııasynyń baspasóz qyzmeti habarlady.
QFF bas bapkerdiń otstavkasyn ókinishpen qabyldap, sheshimine qurmetpen qarady.
Komanda tizginindegi jumysy barysynda Talǵat Baısýfınov quramadaǵy barlyq kezeńi arasynda eń úzdik nátıjeni kórsetti. Onyń ishinde álem chempıonatynyń irikteý kezeńinde Belgııamen óz alańymyzda teń tústi. Onyń jetekshiligimen komanda óz kúshine degen senimdilikti qaıtaryp, FIFA reıtıngindegi ornyn jaqsartty.
— QFF Talǵat Baısýfınovke kásibıligi, isine degen adaldyǵy jáne Qazaqstan ulttyq quramasynyń damýyna qosqan eleýli úlesi úshin alǵys bildiredi, sondaı-aq oǵan aldaǵy kásibı qyzmetinde sáttilik tileıdi, — delingen habarlamada.
Bapkerler shtabyn jasaqtaý boıynsha aldaǵy qadamdar týraly qosymsha habarlanady. Ulttyq quramanyń aldaǵy matchtarǵa daıyndyǵy qalypty kúıde jalǵasady.
Aıta ketelik Baısýfınov Qazaqstan ulttyq quramasynyń bas bapkeri qyzmetine úshinshi ret taǵaıyndalǵan edi.
