Qazaqstan quramasynyń Azııa oıyndaryndaǵy komandalyq sport túrleri boıynsha qarsylastary anyqtaldy
ASTANA. KAZINFORM — 2026 jyldyń 19 qyrkúıegi men 4 qazany aralyǵynda Japonııanyń Aıchı jáne Nagoıa qalalarynda ótetin HH jazǵy Azııa oıyndarynyń komandalyq sport túrleri boıynsha jerebe tartý rásimi aıaqtaldy. Onyń qorytyndysy boıynsha Qazaqstan quramasynyń qarsylastary belgili boldy.
Sý dobynan erler arasyndaǵy básekede Qazaqstan quramasy A tobyna tústi. Otandastarymyz toptyq kezeńde Taıland, Japonııa jáne Gonkong quramalarymen kezdesedi. Áıelder quramasy Qytaı, Japonııa, Sıngapýr, Taıland jáne Ózbekstan komandalaryna qarsy oınaıdy.
Gandboldan erler arasyndaǵy saıysta Qazaqstan quramasy V tobynda Bahreın, Kýveıt, Ońtústik Koreıa jáne Iran quramalarymen synǵa túsedi. Áıelder quramasynyń qarsylastary — Japonııa, Ońtústik Koreıa, Qytaı, Gonkong, Ózbekstan jáne Vetnam.
Regbı-7 boıynsha erler quramasy V tobynda Japonııa, Taıland jáne Ońtústik Koreıa quramalarymen kezdesedi. Áıelder quramasy D tobynda Japonııa, Taıland jáne Sıngapýr komandalaryna qarsy oıyn ótkizedi.
Kógaldaǵy hokkeıden Qazaqstannyń áıelder quramasy A tobyna tústi. Endi olar kelesi kezeńge joldama alý úshin Qytaı, Ońtústik Koreıa, Malaızııa, Qytaı Taıbeıi jáne Bangladesh quramalarymen baq synaıdy.
Buǵan deıin voleıboldan Qazaqstan quramalarynyń da qarsylastary anyqtalǵan bolatyn. Erler quramasy A tobynda Japonııa, Pákistan jáne Ózbekstanmen oınaıdy. Áıelder quramasy V tobynda Qytaı jáne Fılıppın quramalarymen kezdesedi.
Eske salaıyq, Qazaqstan qozǵalmaly nysanaǵa oq atýdan álem chempıonatynda eki kúmis medal jeńip alǵanyn habarlaǵanbyz.
