Qazaqstan quramasy jeńil atletıkadan Azııa chempıonatyn 7 medalmen aıaqtady

ASTANA. KAZINFORM – Tıantszın qalasynda (Qytaı) jeńil atletıkadan jabyq keshendegi Azııa chempıonaty óz máresine jetti.

Ulttyq olımpıadalyq komıtettiń málimetinshe, atalǵan qurlyqtyq birinshilikte Qazaqstan quramasy 7 medal jeńip aldy.

Alına Chıstıakova (bessaıys), Nora Djerýto (3 000 metr), Qazaqstan áıelder quramasy 4×400 metrlik estafetada (Krıstına Kondrashova, Marına Shývalova, Anna Shýmılo, Adelına Zems) altyn júlde jeńip aldy.

Bıiktikke sekirýde el namysyn qorǵaǵan Nadejda Dýbovıtskaıa kúmisten alqa taqty.

Nora Djerýto (1 500 metr), Marııa Efremova (úsh qarǵyp sekirý), Qazaqstan erler quramasy 4×400 metrlik estafetada (Vıacheslav Zems, Mádı Tókenov, Andreı Sokolov, Elnor Mýhıtdınov) qola júldege ıe boldy. 

Jalpykomandalyq esepte Qazaqstan quramasy tórtinshi orynǵa turaqtady.

Eske sala keteıik, buǵan deıin jeńil atletıkadan Qazaqstan áıelder quramasy estafeta jarysynda jeńiske jetkenin jazǵanbyz.