Qazaqstan quramasy Japonııany jeńip, Azııa chempıony boldy
ASTANA. KAZINFORM – Úndistannyń Delı qalasynda ótip jatqan semserlesýden Azııa chempıonatynda Qazaqstan quramasy tórtinshi júldesine qol jetkizdi.
Jarystyń kezekti kúninde erler arasyndaǵy shpagamen semserlesýden Qazaqstan quramasy chempıon atandy.
Fınalǵa Erlik Sertaı, Vadım Sharlaımov, Nıkıta Jýlınskıı jáne Kırıll Prohodovtan quralǵan komanda shyqty. Sheshýshi kezdesýde qazaqstandyq shpagashylarǵa sońǵy eki Olımpıada oıyndarynda altyn jáne kúmis medal jeńip alǵan Japonııa quramasy qarsy turdy.
Tartysty ári shıelenisti ótken kezdesýde Qazaqstan quramasy 45:40 esebimen jeńiske jetip, qurlyq chempıony atandy.
Osylaısha, Qazaqstan quramasynyń qorjynynda tórt medal bar. Jekeleı syndaǵy shpaga básekesinde Irına Bakaldına altyn medal jeńip alsa, Rýslan Kýrbanov qola júldeger atandy. Sonymen qatar erler arasyndaǵy komandalyq qylysh saıysynda Qazaqstan quramasy qola medal ıelengen bolatyn.
Aıta ketelik sapy saıysynan erler quramasy Azııa chempıonatynda altynǵa talasatyny týraly jazǵan edik.
