Qazaqstan quramasy jaǵajaıdaǵy Azııa oıyndaryn segiz medalmen aıaqtady
ASTANA.KAZINFORM - Qazaqstan quramasy Qytaıdyń Sanıa qalasynda ótip jatqan 2026 jylǵy jaǵajaıdaǵy Azııa oıyndarynda óner kórsetýin aıaqtady. Ulttyq quramanyń enshisinde segiz medal bar. Onyń bireýi – altyn júlde.
QR UOK málimetinshe, altyn medaldi 69 kelige deıingi salmaq dárejesinde synǵa túsken djıý-djıtsý sheberi Nurjan Batyrbekov jeńip aldy.
Qazaqstan áıelder quramasy sý dobynan kúmis júldege qol jetkizdi. El namysyn Arıadna Zatylnıkova, Kamıla Naýryzbaeva, Taıra Mýhaeva, ıAna Smolına, Vasılısa Antropova, Fatıma Matkarımova jáne Aıda Alpysbaı qorǵady.
Djıý-djıtsý quramasy altynnan bólek, taǵy úsh qola medal enshiledi. Batyr Teńizbaı (62 kelige deıin), Álınur Qýatuly (69 kelige deıin) jáne Seıilhan Bolatbek (77 kelige deıin) úzdik úshtikten kórindi.
Qazaqstan sý dobynan erler arasynda ótken básekede qorjynǵa taǵy bir qola júldeni saldy. Júldegerler qatarynda Temirlan Balfanbaev, Sultan Shonjigitov, Murat Shákenov, Edýard Tsoı, Rýslan Ahmetov, Aleksandr Eremın jáne Aldııar Ákimbaı bar.
Sporttyq quzǵa órmeleý sheberleri Azııa oıyndaryn eki medalmen túıindedi. Rıshat Haıbýllın jekeleı synda qola júldege ıe boldy. Sonymen qatar Rıshat pen Rashıd Haıbýllınder estafetada da úshinshi orynǵa jaıǵasty.
Sondaı-aq Qazaqstan bul dodada ashyq sýda júzý jáne akvatlonnan aralas komandalyq saıysta, sondaı-aq, jaǵajaı kúresinen Ermahan Kóshkinbaev (80 kelige deıin), Beıbit Seıdýáli (70 kelige deıin) jáne Alına Ertóstik (70 keliden joǵary) tórtinshi oryn aldy. Besinshi orynǵa Daryn Qonysbaev (akvatlon), djıý-djıtsý sheberleri Mansur Habıbýlla (62 kelige deıin), Jibek Qulymbetova (52 kelige deıin) jáne Ajar Salyqova (63 kelige deıin) turaqtady. Jalpy Qazaqstan sportshylary toǵyz sport túrinde baq synady.
Aıta keteıik, jaǵajaıdaǵy Azııa oıyndary 30 sáýirde aıaqtalady. Sońǵy júldeler gandboldan áıelder arasyndaǵy básekede sarapqa salynady.
Fýtboldan Qazaqstan kýbogy shırek fınalyna shyqqan 5 komanda anyqtalǵanyn jazǵan bolatynbyz.
