Qazaqstan quramasy WorldSkills Shanghai 2026 chempıonatynda segiz marapat ıelendi

Memleket basshysy Qasym-Jomart Kemeluly Toqaev jumysshy mamandyqtaryn damytýǵa jáne bilikti kadrlar daıarlaýǵa erekshe kóńil bólip keledi. Prezıdenttiń bastamasymen 2025 jyl Jumysshy mamandyqtary jyly bolyp jarııalandy. Kolledjderdi jan basyna shaqqandaǵy qarjylandyrý kólemi ulǵaıtylyp, jastardyń sapaly kásibı bilim alýyna jańa múmkindikter jasalyp jatyr.

Shanhaıdaǵy álem chempıonatynda Qazaqstan quramasy segiz marapatqa ıe boldy: bir qola medal, kásibı sheberligi úshin alty medal jáne «Best of Nation» marapaty. Bul nátıjeniń artynda stýdentterdiń tabandy daıyndyǵy, tálimgerleriniń eńbegi jáne memlekettiń kásibı bilim berýge kórsetip otyrǵan júıeli qoldaýy tur.

«Ushqyshsyz avıatsııalyq júıeler» quzyrettiligi boıynsha Rýslan Nesterenko qola júldeger atandy. Bul baǵyt álem chempıonatynyń baǵdarlamasyna alǵash ret engizildi. Qazaqstandyq jas maman alǵashqy jarystyń ózinde júldeli oryn alyp, jańa tehnologııalardy meńgerýdegi áleýetin kórsetti.

Kásibı sheberligi úshin medaldardy Aǵybaı Muhametjan («Veb-tehnologııalar»), Nodırbek Rýstamhanov («Santehnıka jáne jylytý»), Vadım Vıtkovskıı («Dánekerleý tehnologııalary»), Darıa Melnık («Ónerkásiptik dızaın»), Baǵyjan Qoıshybaev («Grafıkalyq dızaın»), sondaı-aq «Mehatronıka» boıynsha komanda bolyp qatysqan Ramazan Nurlan men Denıs Panın ıelendi.

«Tsıfrlyq ınteraktıvti medıa dızaıny» quzyrettiligi boıynsha baq synaǵan Kamıla Alıeva «Best of Nation» marapatyna ıe boldy.

— 48-shi álem chempıonatynda Qazaqstan atynan 31 quzyrettilik boıynsha 33 kolledj stýdenti qatysty. Olardyń jetistigi qazaqstandyq jastardyń jumysshy mamandyqtarynda da, ınjenerlik, tsıfrlyq jáne shyǵarmashylyq baǵyttarda da álemdik deńgeıde básekege qabiletti ekenin kórsetti. Jastardy, olardyń ustazdary men sarapshylaryn quttyqtaımyz, — delingen mınıstrlik habarlamasynda.

Aıta ketelik SQO-da aýyl balalaryna dıqanshylyqtyń qyr-syryn mektepten úıretpek.