Qazaqstan quramasy WorldSkills Shanghai 2026 álem chempıonatyna qatysady
ASTANA. KAZINFORM — 22-27 qyrkúıek aralyǵynda Qazaqstan quramasy Qytaıdyń Shanhaı qalasynda ótetin WorldSkills Shanghai 2026 álemdik kásibı sheberlik chempıonatyna qatysady.
Memleket basshysy Qasym-Jomart Toqaev jumysshy mamandyqtarynyń bedelin arttyrýǵa, tehnıkalyq jáne kásiptik bilim berý júıesin damytýǵa erekshe nazar aýdaryp keledi. Osy baǵyttaǵy júıeli jumystyń mańyzdy bóligi - jastardyń kásibı sheberligin halyqaralyq deńgeıde shyńdap, álemdik tájirıbemen almasýyna múmkindik jasaý.
Qazaqstan atynan chempıonatqa 33 jas maman qatysyp, 31 quzyrettilik boıynsha baq synaıdy. Olardyń qatarynda mehatronıka, ınjenerlik grafıka, CNC tehnologııalary, baǵdarlamalyq jáne mobıldi qosymshalardy ázirleý, dánekerleý, elektronıka, mobıldi robototehnıka, elektromontaj, ónerkásiptik dızaın, aspazdyq, avtokólikterdi jóndeý, ushqyshsyz ushý apparattary júıeleri jáne basqa da zamanaýı baǵyttar bar.
WorldSkills - jumysshy mamandyqtarynyń mártebesin arttyrýǵa, tehnıkalyq jáne kásiptik bilim berýdi damytýǵa jáne jastardyń kásibı daǵdylaryn jetildirýge baǵyttalǵan halyqaralyq qozǵalys. Qazaqstandaǵy WorldSkills qozǵalysynyń ulttyq operatory - Oqý-aǵartý mınıstrliginiń «Talap» KeAQ.
Bıylǵy álem chempıonatynda 70-ten astam el men óńirden 1400-den astam jas maman 64 quzyrettilik boıynsha óz sheberligin kórsetedi.
Chempıonattyń ashylý saltanaty 22 qyrkúıekte ótedi. Negizgi jarystar 23-26 qyrkúıek aralyǵynda Shanhaı ulttyq kórme jáne kongress ortalyǵynda uıymdastyrylyp, 27 qyrkúıekte jeńimpazdar men júldegerler marapattalady.
Aıta ketelik Qazaqstandyq oqýshylar Shanhaıdaǵy VEX Robotics týrnırinde úsh júldeni jeńip alǵan edi.
