Qazaqstan quramasy VI Dúnıejúzilik kóshpendiler oıyndarynda eki altyn medal jeńip aldy
ASTANA. KAZINFORM — Qyrǵyzstanda ótip jatqan VI Dúnıejúzilik kóshpendiler oıyndarynda Qazaqstan quramasy aýdaryspaqtan eki altyn medal jeńip aldy.
63 kelige deıingi salmaq dárejesinde óner kórsetken Nurtalap Kerim fınaldyq beldesýde Qyrǵyzstan sportshysynan basym túsip, jarys chempıony atandy.
Al 70 kelige deıingi salmaqta synǵa túsken Saılaý Muhammedjan da fınalda qyrǵyz sportshysymen kezdesip, 2:1 esebimen jeńiske jetti. Bul – Qazaqstan quramasynyń dúbirli dodadaǵy alǵashqy altyn medaldary.
Aýdaryspaq – at ústinde kúsh pen eptilikti, shapshańdyq pen batyldyqty talap etetin qazaqtyń dástúrli ulttyq sporty. Búginde elimizde 11,5 myńnan astam adam aýdaryspaqpen turaqty túrde shuǵyldanady.
Aıta ketelik Qazaqstannan 150-den astam sportshy VI Dúnıejúzilik kóshpendiler oıyndaryna qatysyp jatyr.
