Qazaqstan quramasy TMD chempıonatynda jalpy komandalyq esepte ekinshi oryn aldy
ASTANA.KAZINFORM - Reseı Federatsııasynda armııa qoıan-qoltyq urysynan Táýelsiz Memleketter Dostastyǵynyń chempıonaty ótti. Saıysqa TMD-ǵa múshe elder qarýly kúshteriniń qurama komandalary sapyndaǵy kil myqty sportshylar qatysty. Bul týraly QR Qorǵanys mınıstrligi habarlady.
Chempıonat qorytyndysy boıynsha jalpy komandalyq esepte Reseı Federatsııasy Qarýly kúshteriniń quramasy birinshi oryn ıelendi. Ekinshi oryndy Qazaqstan Respýblıkasy Qarýly kúshteriniń quramasy, úshinshi oryndy Belarýs Respýblıkasy Qarýly kúshteriniń quramasy oljalady. Tórtinshi oryn Ózbekstan Respýblıkasyna, besinshi oryn Qyrǵyzstan Respýblıkasyna, altynshy oryn Tájikstan Respýblıkasyna buıyrdy.
Qazaqstan Qarýly kúshteriniń ókilderiniń qorjynynda alty medal: úsh altyn, bir kúmis jáne eki qola.
Chempıonatta qatardaǵy jaýynger Qasymbaı Muhıt (65 kelige deıin), leıtenant Erjan Oljas (70 kelige deıin), maıor Vadım Fedoseev (75 kelige deıin) jeńiske jetti. 80 kelige deıingi salmaqta efreıtor Darhan Dabylbek kúmis júldeli boldy. Qola júlde alǵandar: serjant Dosqalı Áshirov (85 kelige deıin), serjant Elaman Qýatov (85 keliden joǵary).
Qazaqstan Qorǵanys mınıstrligi Sport komıtetiniń tóraǵasy – Armııa ortalyq sport klýbynyń bastyǵy polkovnık Arman Ábeýov sportshylar men jattyqtyrýshylar shtabyn nátıjeli jetistikterimen quttyqtady.
– Qazaqstan Qarýly kúshteriniń quramasy armııa qoıan-qoltyq urysynan TMD chempıonatynda laıyqty jekpe-jek kórsetti. Dostastyqtyń eń myqty komandalary arasynda ekinshi jalpy komandalyq oryn jáne jeńip alǵan alty medal bizdiń áskerı qyzmetshilerimizdiń joǵary daıyndyǵynyń, kásibıliginiń, batyldyǵy men myqty rýhynyń aıqyn dáleli. Sizder Qazaqstannyń Qarýly kúshterin namysyn halyqaralyq arenada abyroımen qorǵap, otandyq armııa qoıan-qoltyq jekpe-jek mektebiniń bedelin kórsettińizder. Sportshylarǵa, jattyqtyrýshylarǵa jáne osy jetistikke úles qosqandardyń bárine alǵys aıtamyn. Elimizdiń atynan jańa jeńisterge jete berińizder, – dedi Sport komıtetiniń tóraǵasy.
Armııa quramasynyń jemisti óner kórsetýi ásker sportshylarynyń daıyndyq deńgeıi joǵary jáne olardy oqytýdyń qoldanystaǵy júıesiniń tıimdi ekenin aıqyndady.
Aıta keteıik, Qarýly kúshter tarıhynda tuńǵysh ret kıberqaýipsizdik ofıtserleri túlep ushty.
