Qazaqstan quramasy shpagamen semserlesýden álem kýbogy kezeńinde kúmis júldege ıe boldy

ASTANA. KAZINFORM – Shpagamen semserlesýden Qazaqstan quramasy Bazelde (Shveıtsarııa) ótken jasóspirimder arasyndaǵy Álem kýbogynyń fınalyna deıin jetti, dep habarlaıdy Ulttyq olımpıadalyq komıtet.

Komandalyq jarysta elimizdiń namysyn Bogdan Lýkın, Kırıll Prohodov, Nurjan Ábjanov jáne Alekseı Kasatkın qorǵady. Jartylaı fınalda qazaqstandyq shpagashylar Shvetsııa quramasynan basym tústi. Al altyn medal úshin ótken kezdesýde Qazaqstan quramasy Mysyr sportshylaryna ese jiberdi.

Aıta keteıik, buǵan deıin Qazaqstan áıelder quramasy rapıramen semserlesýden jasóspirimder arasyndaǵy álem kýbogynda úshinshi oryn alǵan edi.

Sonymen qatar jekeleı synda Sofıa Aqtaeva jeńimpaz atandy.