Qazaqstan quramasy shahmat Olımpıadasyn jeńispen bastady
ASTANA. KAZINFORM — Samarqandta (Ózbekstan) kezekti Dúnıejúzilik shahmat Olımpıadasy ótip jatyr. Áıelder arasyndaǵy jarystyń alǵashqy týrynda Qazaqstan quramasy Botsvana komandasyn 4:0 esebimen jeńdi. Bul týraly Halyqaralyq shahmat federatsııasynyń (FIDE) baspasóz qyzmetinde jarııalandy.
Jeńiske Alýa Nurman, Merýert Kamalıdenova, Elnaz Qalıahmet jáne Zarına Nurǵalıeva jetti. Komanda kóshbasshysy Bıbisara Asaýbaeva bul kezdesýde qosalqy quramda qaldy.
Qazaqstan áıelder quramasy 2 komandalyq upaı jáne 4 jeke upaı jınap, aralyq týrnır kestesinde úshinshi orynda tur. Odan joǵary Úndistan men Grýzııa quramalary ornalasqan. Olar Qazaqstannan qosymsha kórsetkishter boıynsha alda keledi.
Áıelder arasyndaǵy básekede Úndistan Domınıkan Respýblıkasyn, Grýzııa Týnısti, Qytaı Zambııany, al AQSh Andorrany 4:0 esebimen jeńdi.
Qazaqstannyń erler quramasy da Olımpıadany jeńispen bastady. Komanda Gaıtı quramasyn 4:0 esebimen jeńdi.
Bıylǵy shahmat Olımpıadasy 15 qyrkúıekte bastaldy. Jarys 27 qyrkúıekke deıin jalǵasady. Týrnır shveıtsarııalyq júıe boıynsha 11 týrdan turady.
Áıelder arasyndaǵy básekede Qazaqstan namysyn Bıbisara Asaýbaeva, Alýa Nurman, Merýert Kamalıdenova, Elnaz Qalıahmet jáne Zarına Nurǵalıeva qorǵaıdy.
Al erler quramasy sapynda Denıs Mahnev, Aldııar Ansat, Jandos Aǵmanov, Danııal Sapenov jáne Saýat Nurǵalıev óner kórsetip jatyr.
Eske salaıyq, 2024 jyly Vengrııada ótken shahmat Olımpıadasynda Qazaqstannyń áıelder quramasy kúmis medal jeńip alǵan bolatyn. Bul joly da qazaqstandyq shahmatshylar álemdik reıtıngte tórtinshi orynda turǵan myqty komandalardyń biri retinde týrnırge qatysyp otyr.
Aıta keteıik, álemniń úzdik shahmatshylary Bıbisara Asaýbaevany qıyn qarsylas dep ataǵan bolatyn.
