Qazaqstan quramasy regbıden Omanda ótken týrnırde top jardy

ASTANA. KAZINFORM — Qazaqstan ulttyq quramasy regbıden Oman astanasy Maskat qalasynda ótken Asia Rugby Emirates Men’s Sevens Trophy 2025 týrnırine qatysyp, 15 komandanyń ishinen úzdik shyqty. Bul týraly Týrızm jáne sport mınıstrligi málim etti.

Jerlesterimiz barlyq kezeńde jeńiske jetip, týrnırdiń jeńimpazy atandy. Báseke toptyq kezeń, pleı-off, shırek fınal, jartylaı fınal jáne fınal formatynda ótti. Qazaqstan quramasy óz tobynda Qyrǵyzstan, Saýd Arabııasy jáne Qatar komandalarymen synǵa túsip, barlyq qarsylasynan basym tústi. Sóıtip, topta birinshi orynmen senimdi túrde knockout kezeńine joldama aldy.

Toptyq kezeń (1-kún, 25 qazan):

Qazaqstan – Qyrǵyzstan: 44:0

Qazaqstan – Saýd Arabııasy: 27:0

Qazaqstan – Qatar: 34:7

Pleı-off kezeńi (2-kún, 26 qazan):

Jartylaı fınal:

Qazaqstan – Aýǵanstan: 41:0

(Ekinshi jartylaı fınalda Úndistan Saýd Arabııasyn 17:0 esebimen jeńdi.) 

Fınal: Qazaqstan – Úndistan: 27:0 – sheshýshi matchta da bizdiń sportshylar qarsylasyna múmkindik bermeı, senimdi jeńiske jetti.

Osylaısha Qazaqstan quramasy týrnırdiń bas júldesin enshilep, Asia Rugby Sevens Series týrnıriniń 1-dıvızıonyna joldama aldy. Jalpy alǵanda, Qazaqstan quramasy týrnır boıy tamasha oıyn órnegin kórsetti. Barlyǵy 7 ǵana upaı jiberip, birde-bir matchta jeńilgen joq.

Bul altyn medal regbıden Qazaqstan quramasyn Azııanyń úzdik komandalary qataryna qaıta qosty. Týrnır qorytyndysy boıynsha Qazaqstan men Úndistan joǵary dıvızıonǵa kóterilse, al Ózbekstan men Qytaı Taıbeıi tómengi dıvızıonǵa túsip qaldy. Maskattaǵy bul jeńis – otandyq regbıdiń jańa damý kezeńiniń bastaýy.

Bul jeńis el quramasynyń halyqaralyq arenada óz myqtylyǵyn taǵy bir dáleldep, regbı-7 sportynda Qazaqstannyń qaıtadan jetekshi elge aınalyp kele jatqanyn kórsetti.