Erkin kúresten balýandar Belarýstegi týrnırde 14 medal jeńip aldy

ASTANA. KAZINFORM – Mınskide (Belarýs) Aleksandr Medvedti eske alýǵa arnalǵan halyqaralyq Gran-prı týrnıri aıaqtaldy.

Ulttyq olımpıadalyq komıtettiń málimetinshe, atalǵan dodada Qazaqstan quramasy 14 medal jeńip aldy.

Erkin kúresten Edige Qasymbek 125 kelige deıingi salmaqta altynnan alqa taqty.

Nurlan Ótegenov (79 kelige deıin) jáne Dáýlet Ergesh (86 kelige deıin) kúmis medal aldy. Al Meıirjan Ashırov (74 kelige deıin), Erasyl Muhtaruly (57 kelige deıin), Adı Serikuly (65 kelige deıin), Nachyn Kýýlar (70 kelige deıin), Sanjar Dosjanov (74 kelige deıin), Nurkerim Ernııaz jáne Beıbarys Qasymbek (92 kelige deıin) jarysty qola medalmen aıaqtady.

Sondaı-aq ulttyq qurama áıelder arasyndaǵy básekede eki kúmis jáne eki qola medalǵa ıe boldy. Laýra Ǵanıqyzy (50 kelige deıin), Alına Ertóstik (76 kelige deıin) ekinshi oryn aldy. 68 kelige deıingi salmaqta synǵa túsken Irına Kazıýlına jáne Elena Shalygına úzdik úshtikti túıindedi.

Budan buryn erkin kúresten Qazaqstan ulttyq quramasy bas bapkeri Danııar Qaısanovtyń ulttyq quramanyń aldaǵy josparyn jarııalaǵanyn jazǵan edik.