Qazaqstan quramasy Kóshpendiler oıyndarynda kókpardan Qyrǵyzstanǵa ese jiberdi
ASTANA. KAZINFORM – Qyrǵyzstandyq kókparshylar sheshýshi matchtyń basym bóliginde alda boldy. Úzilisten keıin olar qarsylasyna birde-bir upaı jınaýǵa múmkindik bermedi, dep habarlaıdy Kazinform tilshisi.
Qazaqstan quramasy fınalǵa eki jeńispen jetti. Kóshpendiler oıyndarynyń qazirgi chempıony toptyq kezeńde Reseı quramasyn 14:1 esebimen oısyrata jeńip, keıin Majarstannan 9:4 esebimen basym tústi. Qazaqstandyqtar V tobynda birinshi oryn alyp, týrnır fınalyna qatarynan úshinshi ret shyqty.
Sheshýshi kezdesý 6 qyrkúıekte Cholpon-Atadaǵy «Kók-Bóri» alańynda ótti. Alań ıeleri birinshi mınýtta-aq Dastan Rýslanovtyń salymymen esep ashty. Toǵyzynshy mınýtta Qurmanbek Turǵanbek san basymdyǵyn paıdalanyp, esepti teńestirdi.
Odan keıin Manas Nııazov pen Dastan Rýslanov Qyrǵyzstanǵa eki upaılyq basymdyq ákelip, esepti 3:1-ge jetkizdi. Yntymak Alıpbaev 13-mınýtta nátıjeli shabýyl jasap, Qazaqstan quramasynyń esep aıyrmasyn qysqartty.
Úziliske az ýaqyt qalǵanda qyrǵyzstandyqtar taǵy bir salym jasady. Alaıda keıin tóreshiler bul upaıdy eseptemedi. Sebebi komandalar tóreshiniń ysqyryǵyn kútpeı oıyndy qaıta bastaǵan. Osylaısha, birinshi taımnan keıin Qazaqstan 2:3 esebimen utylyp jatty.
Kezdesýdiń ekinshi bóliginde Qazaqstan quramasy esepti ózgerte almady. Qyrǵyzstan sportshylary jaýapsyz tórt salym jasap, upaılardy Ysqaq Bekbolot ýýlý, Dastan Rýslanov, Manas Nııazov jáne taǵy da Ysqaq Bekbolot ýýlý enshiledi. Fınal Qyrǵyzstannyń 7:2 esebimen jeńisimen aıaqtaldy.
Osylaısha, Qyrǵyzstan quramasy altyn medal, Qazaqstan kúmis júlde ıelendi. Qola júlde Reseı quramasyna buıyrdy. Reseılikter úshinshi oryn úshin kezdesýde Ózbekstandy 5:4 esebimen jeńdi.
Osy fınalǵa deıin Qazaqstan men Qyrǵyzstan ulttyq quramalary kókpar erejesi boıynsha úsh ret kezdesken jáne úsh matchtyń barlyǵynda qazaqstandyqtar jeńiske jetken. 2017 jyly Qazaqstan álem chempıonatynyń fınalynda 4:1 esebimen jeńiske jetse, Dúnıejúzilik kóshpendiler oıyndarynda Qyrǵyzstandy 2022 jyly 4:3, 2024 jyly 5:4 esebimen utqan.
Qazirgi jeńis Qyrǵyzstan quramasynyń Qazaqstandy kókparda alǵash ret jeńýi boldy.
