Qazaqstan quramasy kórkem gımnastıkadan Azııa chempıonatynda 9 medal jeńip aldy
ASTANA. KAZINFORM – Búgin, 26 mamyrda Bishkekte (Qyrǵyzstan) kórkem gımnastıkadan Azııa chempıonaty óz máresine jetti.
Týrnırdiń sońǵy jarys kúninde jekeleı jattyǵýlar boıynsha fınaldar ótip, júldeler sarapqa salyndy. Qazaqstandyq gımnastar barlyq baǵdarlamada medal jeńip aldy.
Aqmaral Erekesheva jarysty sátti ótkizip, qorjynyna taǵy úsh júlde saldy. Ol shyǵyrshyqpen oryndalatyn jattyǵýda kúmis medal enshilep, dop jáne urshyqtarmen oryndalatyn jattyǵýlarda qola júldeger atandy. Al Aıbota Ertaıqyzy taspamen oryndalatyn jattyǵýda úshinshi orynǵa ıe boldy.
QR UOK málimetinshe, toptyq jattyǵýlarda Qazaqstan quramasy eki ret jeńis tuǵyryna kóterildi. Aızere Keńes, Aızere Nurmaǵambetova, Krıstına Chepýlskaıa, Madına Myrzabaı, Aıda Hákimjanova jáne Jasmın Júnisbaeva bes doppen oryndalatyn jattyǵýda ekinshi oryn aldy. Sondaı-aq ulttyq qurama úsh shyǵyrshyq jáne eki jup urshyqpen oryndalatyn jattyǵýlarda kúmis medalǵa ıe boldy.
Aıta keteıik, buǵan deıin Aıbota Ertaıqyzy jekeleı kópsaıysta kúmis júldeger atanǵan edi. Al toptyq kópsaıysta qazaqstandyq gımnastar jarysty úshinshi orynmen aıaqtady. Komandalyq kópsaıys qorytyndysynda Qazaqstan quramasy ekinshi oryn aldy.
Qazaqstan ústel tennısshileri Tájikstan týrnırinde 6 júlde ıelengenin jazǵan edik.
