Qazaqstan quramasy konkımen júgirýden álem chempıonatynda altyn medal jeńip aldy

ASTANA. KAZINFORM — Qazaqstannyń áıelder quramasy konkımen júgirýden Germanııanyń Intsell qalasynda ótip jatqan jasóspirimder arasyndaǵy álem chempıonatynda top jardy.

Qazaqstandyq sportshylar komandalyq sprıntte jeńiske jetti. Otandastarymyz 1:28.77 ýaqytta márege jetti.

Bul synda el namysyn Krıstına Shýmekova, Anastasııa Belovodova jáne Varvara Glýhova qorǵady.

Polsha quramasy 1:28.94 ýaqyt nátıjesimen kúmis júldege ıe bolsa, Kanada 1:29.25 ýaqyt kórsetkishimen úshinshi oryn aldy.

Aıta keteıik, buǵan deıin Krıstına Shýmekova 500, 1000 jáne 1500 metr qashyqtyqtarynda chempıon atanyp, 3000 metrde kúmis júlde jeńip alǵan edi. Sondaı-aq ol kishi kópsaıysta da top jardy.

Eske salsaq Krıstına Shýmekova Germanııadaǵy álem chempıonatynda taǵy da úzdik shyqqan edi.