Qazaqstan quramasy komandalyq shpagamen semserlesýden FIE álemdik reıtınginde alǵash ret kósh bastady
ASTANA. KAZINFORM — Qazaqstan erler quramasy shpagamen semserlesýden Halyqaralyq semserlesý federatsııasynyń (FIE) álemdik reıtınginde alǵash ret birinshi orynǵa kóterildi.
Jańartylǵan reıtıngide ulttyq qurama 354 upaı enshilep, Frantsııa (310 upaı) men Shveıtsarııany (296 upaı) artta qaldyrdy. Úzdik bestiktiń qataryna Italııa (286 upaı) men Ýkraına (280 upaı) da kirdi.
Bul tarıhı jetistikke qazaqstandyq shpagashylar iri halyqaralyq jarystarda sátti óner kórsetýiniń arqasynda qol jetkizdi. 2025 jyly qarashada ulttyq qurama Saýd Arabııasynyń Er-Rııad qalasynda ótken Islam yntymaqtastyǵy oıyndarynda top jardy. 2026 jylǵy maýsymda Úndistannyń Nıý-Delı qalasynda Azııa chempıony atansa, shildede Qytaıdyń Gonkong qalasynda ótken álem chempıonatynda altyn medal jeńip aldy. Al bıyl kúzde Aıchı men Nagoıada (Japonııa) ótken Azııa oıyndarynda da jeńiske jetti.
QR UOK málimetinshe, jańa maýsym bastalar aldynda Qazaqstan álemdik reıtıngte úshinshi orynda turǵan edi. Ol kezde Shveıtsarııa men Frantsııa quramalary alda boldy. Qazaqstan quramasy Marokkonyń Kasablanka qalasynda ótken Álem kýbogy kezeńinde top jaryp, altyn medal jeńip aldy. Osy jeńistiń arqasynda ulttyq qurama álemdik reıtıngte birinshi orynǵa kóterildi. Osylaısha qazaqstandyq semserlesýshiler 2026/27 jylǵy maýsymdy sátti bastady.
Kasablankadaǵy jarysta Qazaqstan namysyn Kırıll Prohodov, Vadım Sharlaımov, Aleksandr Fedotov jáne Kırıll Pavlov qorǵady. Sheshýshi kezdesýde qazaqstandyqtar Reseı quramasyn 45:40 esebimen jeńdi.
Prezıdent qazaqstandyq semserlesýshilerdi álem kýbogy kezeńindegi jeńisimen quttyqtaǵan bolatyn.
