Qazaqstan quramasy Kanvon Olımpıadasyn 20-orynmen aıaqtady
KANVON. KAZINFORM – Búgin Ońtústik Koreıanyń Kanvon qalasynda ótip jatqan Qysqy jasóspirimder Olımpıadasy máresine jetti. Qazaqstan quramasy tórtjyldyq dodany 1 altyn, 2 qola medalmen jalpykomandalyq esepte 20-orynmen aıaqtady.
Jasóspirimder arasyndaǵy Qysqy Olımpıada oıyndarynyń tuńǵysh altyn medalin shańǵymen tuǵyrdan sekirýden Qazaqstan komandasynyń múshesi Ilıa Mızernyh jeńip alyp, esimin qazaq sportynyń tarıhyna altyn áriptermen jazyp qaldyrdy.
Al qola medaldiń birin short-trekten 1000 metr qashyqtyqta synǵa túsken sportshylarymyz arasynan Polına Omelchýk jeńip alsa, ekinshi qola medaldi Qazaqstan qorjynyna hokkeıshilerimiz saldy.
Osylaısha Kanvon Olımpıadasy qazaq sportshylary úshin sátti boldy dep aıtýǵa bolady. Olaı deıtinimiz osyǵan deıin Qazaqstan jasóspirimderi 3 Olımpıadaǵa qatysyp, altyn medalǵa qol jetkize almaı kele jatqan bolatyn. Bıyl sol olqylyqtyń oryny tolyp, sportshylarymyz tabysty óner kórsete bildi.
Olımpıada oıyndarynyń ashylý saltanatynda Qazaqstan Týyn petropavldyq konkımen júgirý sportynyń ókili Krıstına Shýmekova men oraldyq short-trekshi Erasyl Shyńǵyshanustap shyqty.
Olımpıada oıyndarynyń alaýy 19 qańtar kúni tutanǵan bolatyn. Kanvon provıntsııasynyń Kannyn qalasynda ótken dodada Qazaqstan jasóspirimder quramasy sapynda 41 sportshy 5 sport túrinen baq synap, 55 júlde jıyntyǵyn sarapqa saldy.
Atap aıtar bolsaq, bıatlon, kerlıng, konkımen júgirý, short-trek, shaıbaly hokkeı, shańǵy jarysy, shańǵymen tuǵyrdan sekirý, shańǵy qossaıysy, taý shańǵysy, frıstaıldan paralleldi mogýl boıynsha synǵa tústi.
Atalǵan jarysqa álemniń 80-ge jýyq elinen 1 800 sportshy qatysyp, júldeli oryndarǵa talasty. Jalpy 7 sport túrinen (15 dıstsıplına) 81 medal jıyntyǵy sarapqa salyndy.
