Qazaqstan quramasy hımııadan halyqaralyq olımpıadada el namysyn qorǵap jatyr

Álemdegi eń bedeldi zııatkerlik jarystardyń biri sanalatyn olımpıada alǵash ret 1968 jyly Chehoslovakııada uıymdastyrylǵan. Búginde bul bilim dodasy 90-nan astam eldiń eń daryndy jas hımıkterin biriktiretin halyqaralyq alańǵa aınaldy.

Bıyl olımpıadaǵa 350-den astam oqýshy qatysyp, teorııalyq jáne praktıkalyq kezeńder boıynsha baq synaýda. Ár kezeń 5 saǵatqa sozylady. Qatysýshylardyń hımııadan tereń bilimi, kúrdeli esepterdi sheshý qabileti jáne zerthanalyq tájirıbeni meńgerý deńgeıi jan-jaqty baǵalanady.

Oqý-jattyǵý jıyndarynyń qorytyndysy boıynsha Qazaqstan ulttyq quramasynyń sapyna tórt oqýshy endi:

• Qalı Ábilmansur — Astana qalasy Nura aýdanyndaǵy jaratylystaný-matematıka baǵytyndaǵy Nazarbaev Zııatkerlik mektebiniń 11-synyp oqýshysy;

• Jaqsylyqov Ansar — Astana qalasyndaǵy Spectrum International School mektebiniń 11-synyp oqýshysy;

• Poletaev Danıl — Almaty qalasy Bilim basqarmasynyń «№ 134 lıtseı» KMM-niń 11-synyp oqýshysy;

• Jeńishanova Aızere — Óskemen qalasyndaǵy jaratylystaný-matematıka baǵytyndaǵy Nazarbaev Zııatkerlik mektebiniń 11-synyp oqýshysy.

Hımııadan halyqaralyq olımpıada (IChO) — mektep oqýshylary arasyndaǵy hımııa páni boıynsha eń bedeldi halyqaralyq jarystardyń biri. Qazaqstan ulttyq quramasy IChO olımpıadasyna 1998 jyldan beri turaqty túrde qatysyp keledi. Osy ýaqytqa deıin qazaqstandyq oqýshylar 10 altyn, 35 kúmis, 48 qola medal jáne 4 Qurmet gramotasyn ıelendi. 2025 jyly ulttyq qurama 2 altyn jáne 2 kúmis medal jeńip alyp, joǵary nátıje kórsetti.

Aıta ketelik Qazaqstandyq oqýshylar Gonkongte robototehnıka jarysynda top jarǵan edi.