Qazaqstan quramasy Halyqaralyq matematıkalyq olımpıadada alty medal jeńip aldy
ASTANA. KAZINFORM — 2026 jylǵy 13-21 shilde aralyǵynda Qytaı Halyq Respýblıkasynyń Shanhaı qalasynda 67-shi Halyqaralyq matematıkalyq olımpıada (International Mathematical Olympiad, IMO) ótti. Álemdegi eń bedeldi ári eń kóne zııatkerlik bilim jarystarynyń birine 117 memleketten 700-ge jýyq daryndy oqýshy qatysty.
Olımpıada qorytyndysy boıynsha Qazaqstan quramasy 3 kúmis jáne 3 qola medal jeńip aldy.
Kúmis medal ıegerleri:
• Tımýr Murat - Almaty qalasyndaǵy «Haileybury Almaty» halyqaralyq mektebiniń 12-synyp oqýshysy;
• Álı Erkebulanuly - Almaty qalasyndaǵy «NURORDA» mektep-lıtseıiniń 11-synyp oqýshysy;
• Batyrhan Beıganov - Respýblıkalyq fızıka-matematıka mektebiniń 10-synyp oqýshysy.
Qola medal ıegerleri:
• Erasyl Altynbek - Almaty qalasyndaǵy «NURORDA» mektep-lıtseıiniń 11-synyp oqýshysy;
• Marǵulan Sharel - Astana qalasyndaǵy Spectrum halyqaralyq mektebiniń 12-synyp oqýshysy;
• Amırlan Amanjolov - Almaty qalasyndaǵy «Haileybury Almaty» halyqaralyq mektebiniń 12-synyp oqýshysy.
Qurama jetekshileri:
• Asylbek Ábdiáshimuly Isahov - Qazaqstan-Amerıka erkin ýnıversıtetiniń prezıdenti;
• Qanat Qaıratuly Satylhanov - halyqaralyq jáne respýblıkalyq olımpıadalardyń birneshe dúrkin júldegeri.
Halyqaralyq matematıkalyq olımpıada 1959 jyldan beri ótkizilip kele jatqan álemdegi eń bedeldi ári eń kóne pándik olımpıadalardyń biri. Qazaqstan bul bilim dodasyna 1992 jyldan beri turaqty qatysyp keledi.
Osy ýaqyt ishinde ulttyq qurama olımpıadaǵa 34 ret qatysyp, 16 altyn, 54 kúmis jáne 86 qola medal, sondaı-aq 30 Qurmet gramotasyn ıelendi. Bul qazaqstandyq oqýshylardyń joǵary daıyndyq deńgeıin, pedagogterdiń júıeli eńbegin jáne Qazaqstannyń halyqaralyq olımpıadalyq qozǵalystaǵy berik ornyn taǵy bir márte aıqyn kórsetti.
Aıta ketelik Qazaqstandyq oqýshylar halyqaralyq jasandy ıntellekt olımpıadasynda 4 júlde alǵan edi.
