Qazaqstan quramasy Halyqaralyq bıologııa olımpıadasynda tórt medal jeńip aldy
ASTANA. KAZINFORM - Lıtvanyń Vılnıýs qalasynda 37-shi Halyqaralyq bıologııa olımpıadasy (International Biology Olympiad, IBO-2026) óz máresine jetti. 12-19 shilde aralyǵynda ótken álemdegi eń bedeldi zııatkerlik jarystardyń birine 84 elden 330-dan astam daryndy jas bıolog qatysty.
Olımpıada barysynda qatysýshylar kúrdeli teorııalyq tapsyrmalarmen qatar, tereń bilim men zertteýshilik daǵdylardy talap etetin zerthanalyq tájirıbelerdi de sátti oryndady.
Jarys qorytyndysy boıynsha Qazaqstan quramasy úsh kúmis jáne bir qola medal jeńip alyp, 1996 jyly qol jetkizilgen ulttyq quramanyń Halyqaralyq bıologııa olımpıadasyndaǵy úzdik nátıjesin qaıtalady.
Qazaqstan quramasynyń júldegerleri:
Qaıyrken Ersultan - Pavlodar oblysyndaǵy «Bilim-ınnovatsııa» daryndy er balalarǵa arnalǵan lıtseı-ınternatynyń 11-synyp oqýshysy;
Áshirhanov Álıhan - Almaty qalasyndaǵy «Bilim-ınnovatsııa» mamandandyrylǵan lıtseı-ınternatynyń 9-synyp oqýshysy;
Jeltova Sofıa - Almaty qalasy Medeý aýdanyndaǵy NIS-tiń 11-synyp oqýshysy;
Mejenına Evgenııa - Qaraǵandy qalasyndaǵy NIS-tiń 11-synyp oqýshysy.
Qurama komandanyń jetekshileri men jattyqtyrýshylary:
Leıla Asqarova - MD, Nazarbayev University;
Іlııas Sákimov - «Bilim-ınnovatsııa» HQQ ádiskeri;
Kámılá Sadyqova - Nazarbayev University zerthanasynyń úılestirýshisi;
Dinmuhammed Orazbaev - Astana medıtsına ýnıversıtetiniń stýdenti.
Oqý-aǵartý mınıstrligi málimetinshe, Halyqaralyq bıologııa olımpıadasy 1990 jyldan beri ótkizilip keledi.
Qazaqstan bul olımpıadaǵa 1994 jyldan beri turaqty qatysyp keledi. 2025 jyly ulttyq qurama tórt qola medal jeńip alsa, 2026 jyly 1996 jylǵy úzdik nátıjeni qaıtalap, qazaqstandyq oqýshylardyń álemdik deńgeıdegi joǵary daıarlyǵyn taǵy bir márte dáleldedi.
Aıta keteıik, Ózbekstannyń Tashkent qalasynda ótken 58-shi Halyqaralyq hımııa olımpıadasynda (International Chemistry Olympiad, IChO 2026) Qazaqstan quramasy 100 paıyzdyq nátıje kórsetti.
