Qazaqstan quramasy Grekııadan oısyraı jeńilip qaldy

ASTANA. KAZINFORM - Fýtboldan Qazaqstan quramasy Ulttar lıgasy S joly boıynsha pleı-off satysy jartylaı fınalynda Grekııadan jeńildi. Osylaısha 2024 jylǵy Eýropa chempıonatynyń joldamasyna qol jetkize almady.

Qazaqstan quramasynyń bas bapkeri Magomed Adıev alǵashqy mınýttan Shatskıı, Vorogovskıı, Erlanov, Marochkın, Bystrov, Qaıyrov, Astanov, Zaınýtdınov, Beısebekov, Chesnokov, Samorodovqa senim artty.

Alǵashqy mınýttan grekııalyq fýtbolshylar oıyndy belsendi bastady. Nátıjesinde birinshi kezeńde olardyń qatarynan Anastasıos Bakasetas 9-mınýtta penaltıdi múltiksiz oryndap, óz quramasyn alǵa shyǵardy.

Odan keıin qazaqstandyq fýtbolshylardyń óreskel qateligin sheber paıdalanǵan Dımıtrıos Pelkas 15, Fotıs Ioannıdıs 37, Dımıtrıos Kýrbelıs 40-mınýtta qatarynan úsh gol soǵyp ketti. Oıynnyń 87-mınýtynda Erkin Tapalov óziniń qaqpasyna gol soǵyp aldy.

Osylaısha Qazaqstan quramasy qarsylasynan 0:5 esebimen jeńilip qaldy.

Endi Grekııa quramasy Ulttar lıgasy S joly boıynsha pleı-off satysy fınalynda 26 naýryzda Grýzııamen sheberlik baıqasady. Olar búgin Lıýksembýrg quramasyn 2:0 esebimen súrindirdi.

Fınalda jeńimpaz bolǵan qurama Eýropa chempıonaty fınaldyq satysynda F tobyndaǵy Túrkııa, Portýgalııa jáne Chehııa qataryna qosylady.